DILI, STLTIMORLESTE.com – Ministériu Edukasaun (ME) fasil atu deteta diploma falsu ne’ebé ema lori atu legaliza, tanba instituisaun ne’e iha baze de dadus kona-ba estudante sira ne’ebé remata ona ensinu baziku no ensinu sekundáriu.
Koordenadór Gabinete Unidade Kurríkulu Nasionál ME, João Mau Pelu fó informasaun ne’e ba STL, Sesta-feira (30/10/2026).
João Mau Pelu esplika katak, baze de dadus kona-ba estudante sira ne’ebé remata estudu iha nivel ensinu baziku no ensinu sekundáriu ajuda Ministériu Edukasaun atu verifika no deteta diploma ne’ebé karik falsifikadu.
Nia hatutan katak, diploma hotu-hotu ne’ebé ema lori atu legaliza tenke liu husi prosesu verifikasaun ne’ebé rigorozu, liuliu hosi diretór sira no estrutura edukasaun iha nivel munisipál no nasionál.
Tanba ne’e, nia husu atu halo verifikasaun ba diploma sira ho kuidadu no kompara ho lista estudante sira ne’ebé Ministériu fahe ona ba munisípiu no direksaun nasionál, hodi fasilita prosesu identifikasaun ba dokumentu falsu.
Iha parte seluk, Diretór Nasionál Ensinu Sekundáriu iha ME, Benjamin Gomes da Cruz Fernandes, dehan katak direksaun ne’e kontinua fó atendimentu loroloron ba ema sira ne’ebé lori diploma atu legaliza.
Nia esplika katak, bainhira iha diploma ne’ebé levanta dúvida ka deteta indikasaun falsifikasaun, direksaun sei informa ba estrutura kurríkulu atu halo verifikasaun tuirmai.
“Ami-nia direksaun kada loron fó atendimentu ba ema ne’ebé mai legaliza diploma. Konaba númeru hira, ne’e depende ba ema hira mak mai legaliza diploma,” Benjamin Gomes da Cruz Fernandes dehan.
Enkuantu ne’e, Josefina da Costa, sidadaun ida ne’ebé mai legaliza diploma, hatete katak bainhira lori diploma ba ME atu legaliza, nia tenke lori diploma orijinál no kópia dokumentu nian tahan lima.
Nia hatutan katak, bainhira la lori diploma orijinál, Ministériu Edukasaun la bele fó atendimentu ba prosesu legalizasaun diploma nian.
(jac)
