DILI, STLTIMORLESTE.com – Inan isin rua obriga fahe kama ida hodi deskansa iha Sentru Saúde Comoro, tanba falta kama, ne’ebé hamosu preokupasaun kona-ba saúde no seguransa pasiente sira.
Situasaun ne’e sai preokupasaun depois pasiente sira hato’o katak kama iha Sentru Saúde Comoro la sufisiente, atu atende inan isin sira ne’ebé ba konsulta no hein atu partus.
Falta kama obriga inan isin na’in rua deskansa hamutuk iha kama ida, maski sira presiza fatin ne’ebé di’ak, liuliu bainhira sente moras ka hein atu partus.
Kondisaun ne’e hamosu preokupasaun kona-ba atendimentu saúde ba inan isin sira, tanba falta fasilidade bázika bele afeta sira-nia deskansu no kualidade kuidadu ne’ebé sira simu.
Akademista Universidade da Paz (UNPAZ), Eduardo da Silva, konsidera situasaun ne’e labele kontinua, tanba falta kama la’ós de’it kestaun fasilidade, maibé mós kona-ba saúde no dignidade inan isin sira-nian.
“Tuir pasiente sira-nia deklarasaun, kama la sufisiente. Inan isin sira tenke fahe kama hodi deskansa. Ne’e la’ós situasaun normál, tanba sira presiza fatin seguru no moos,” dehan Eduardo ba STL, iha Delta, Dili, Sesta (06/11/2026).
Nia esplika katak inan isin sira presiza deskansa sufisiente molok partus. Fahe kama bele halo sira susar atu toba no aumenta risku ba saúde, liuliu kona-ba transmisaun moras.
“Inan isin presiza deskansa ho di’ak molok partus. Se sira tenke fahe kama, oinsá sira bele deskansa no sente seguru, Estadu tenke tau atensaun sériu,” nia hateten.
Eduardo konsidera Sentru Saúde Comoro hanesan fasilidade saúde ne’ebé atende komunidade barak iha Dili. Tanba ne’e, Ministériu Saúde presiza aumenta kama no hadi’a kondisaun atendimentu.
“Ita ko’alia kona-ba moris inan no oan nian. Ne’e la’ós de’it problema kama, maibé problema sistema saúde nian. Presiza solusaun lalais molok mosu problema boot,” nia afirma.
Nia husu autoridade saúde atu halo inspesaun direta ba Sentru Saúde Comoro, rona pasiente sira-nia preokupasaun no buka solusaun atu inan isin sira la presiza fahe tan kama.
Iha parte seluk, Observadór Polítika, Carlito Magno, kritika Governu nia prioridade ba setór saúde, liuliu kona-ba disponibilidade fasilidade bázika ba inan isin sira iha sentru saúde.
“Osan Estadu nian barak, maibé bainhira to’o iha sentru saúde, kama mós la to’o ba inan isin sira. Ne’e hatudu Governu seidauk tau prioridade ba saúde,” dehan Carlito.
Nia konsidera katak dezenvolvimentu labele limita de’it ba diskursu polítiku, maibé tenke hatudu liuhusi hadi’a atendimentu públiku, liuliu iha setór saúde ne’ebé diretamente liga ho moris povu nian.
Carlito afirma katak inan isin sira ne’ebé obriga fahe kama hatudu problema iha prestasaun servisu saúde, ne’ebé presiza hetan atensaun no mudansa sériu husi autoridade kompetente.
“Povu la presiza promesa foun. Povu presiza kama, fasilidade no atendimentu dignu. Se Governu la bele rezolve problema kama, oinsá bele garante saúde ba povu tomak?” nia husu.
Entretantu, antes ne’e, Natalina Pinto, ida husi inan ne’ebé simu atendimentu iha Sentru Saúde Comoro, hato’o katak falta kama obriga pasiente na’in rua atu deskansa hamutuk iha kama ida.
Nia konta katak, maski sente moras, pasiente sira tenke simu kondisaun ne’e tanba la iha fatin seluk atu deskansa durante simu atendimentu iha sentru saúde refere.
“Fatin la sufisiente no klot. Maski sente moras, maibé tenke toba de’it tanba kondisaun mak hanesan ne’e,” dehan Natalina.
Natalina husu Governu atu fó atensaun ba infraestrutura no fasilidade saúde, liuliu disponibilidade kama ba inan isin sira, tanba kondisaun ne’e bele hamosu risku ba inan no bebé.
(car)
