DÍLI, STLTIMORLESTE.com – Gabinete Apoiu Tékniku (GAT) husi Eskola Bázika Sentral (EBC) Manleuana, kontinua hala’o kontrolu loroloron ba implementasaun Programa Merenda Eskolar (PME), liuliu ba fornesedór sira ne’ebé prepara hahan ba estudante sira.
Responsável Gabinete Apoiu Tékniku (GAT), Narciso Pinto Soares Vieira da Costa hato’o informasaun ne’e ba STL, iha Segunda-feira (09/11/2026).
Nia esplika katak, GAT hala’o kontrolu durante loron Segunda-feira to’o Sexta-feira, atu asegura katak fornesedór sira prepara no fornese merenda eskolar tuir padraun no menu ne’ebé determina ona.
“Hahu husi Segunda-feira to’o Sexta-feira, hau sempre ba haree fornesedór sira ne’ebé te’in no prepara merenda eskolar ba estudante sira. Ida-ne’e mak servisu GAT nian, ne’ebé loroloron tenke halo kontrolu ba implementasaun programa ne’e iha ami-nia eskola,” nia dehan.
Nia hatutan katak, to’o agora, implementasaun Programa Merenda Eskolar la’o normal. Programa ne’e sei kontinua to’o loron 30 fulan Novembru, no estudante sira kontinua asesu merenda eskolar hanesan baibain. GAT mós sei kontinua halo kontrolu ba fornesedór sira ne’ebé responsavel ba preparasaun hahan.
Narciso esplika tan katak, menu ne’ebé fornesedór sira prepara bazeia ba menu ne’ebé determina ona. Iha eskola ne’e, total fornesedór na’in 12 mak envolve iha preparasaun merenda ba estudante sira.
“Menu ne’ebé ita uza, fornesedór sira te’in tuir menu ne’ebé determina ona. Ami-nia fornesedór hamutuk na’in 12 mak prepara hahan ba estudante sira, no sira halo tuir menu ne’ebé iha ona,” nia afirma.
Iha parte seluk, estudante ida, Julio Moniz, hato’o nia kontentamentu tanba loroloron bele asesu merenda eskolar iha eskola. Nia dehan katak merenda ne’e inklui etu, na’an, modo-tahan, ai-fuan no hahán seluk.
“Ami sente kontente tanba loroloron mai eskola ami bele han etu ho na’an, modo-tahan, ai-fuan no seluk tan. Ami han tuir oras ne’ebé determina ona. Dadeer mai eskola, ami tuir aula uluk, depois de aula mak ami asesu merenda eskolar,” nia komenta.
Julio hatutan katak, antes mai eskola, estudante sira halo ona matabixu iha uma, maibé depois tuir aula, sira bele asesu merenda iha eskola. Tanba ne’e, nia sente kontente ho implementasaun programa ne’e.
Enkuantu ne’e, estudante seluk, Luisa Guterres, hato’o agradese ba Ministériu Edukasaun (ME) no instituisaun eskola tanba durante prosesu aprendizajen, estudante sira la’ós de’it hetan oportunidade atu aprende, maibé mós asesu merenda eskolar.
“Ami agradese ba ME no eskola tanba durante ne’e ami mai eskola atu tuir aprendizajen no mós asesu merenda eskolar. Ami han na’an, modo, susu-ben no ai-fuan ne’ebé fornesedór sira prepara ona,” nia dehan.
(jac)
