DÍLI, STLTIMORLESTE.com – Estudante hamutuk 1.689 hosi Eskola Ensinu Baziku Central (EBC) Manleuana sei tuir Ezame III Períodu, ne’ebé sei hala’o iha loron 23 fulan Novembru 2026. Preparasaun ba ezame refere remata ona, inklui preparasaun pontu ezame nian.
Gabinete Apoiu Tékniku (GAT), Narciso Pinto Soares Vieira da Costa, hato’o informasaun ne’e ba STL, iha Segunda-feira (09/11/2026), katak eskola prepara hotu ona buat hotu ne’ebé presiza atu garante prosesu ezame lao tuir planu.
Nia hateten katak, komisaun sira no parte eskola nian halo ona preparasaun, inklui pontu ezame, no agora hein de’it loron atu estudante sira bele tuir ezame refere.
“Ami hosi parte eskola nian prepara ona komisaun sira no pontu ezame hotu. Preparasaun hotu ona, agora hein estudante sira tuir ezame de’it. Ezame III Períodu sei hala’o iha loron 23 fulan Novembru 2026. Total estudante ne’ebé sei partisipa hamutuk 1.689,” nia akresenta.
Entretantu, Diretór EBC Manleuana, Carlos Correia afirma katak, eskola prepara ona ba realizasaun Ezame III Períodu ne’e. Tanba ne’e, nia husu estudante sira atu kontinua prepara an ho di’ak molok loron ezame to’o.
“Hau hanoin katak estudante sira bele prepara an ho di’ak atu tuir Ezame III Períodu,” nia informa.
Iha parte seluk, estudante ida, Mario de Jesus, konfirma katak sira sei tuir ezame iha loron 23 fulan Novembru. Nia mós hateten katak estudante sira presiza uza tempu ne’ebé iha atu prepara an molok loron ezame to’o.
“Hau hanoin katak ami sei tuir ezame iha loron 23 fulan ne’e. Tanba ne’e, agora dadaun ami presiza prepara an atu bele tuir Ezame III Períodu, tanba loron ezame besik ona,” nia deklara.
(jac)
