DÍLI, STLTIMORLESTE.com – Kompetisaun Kopa Juvenil Futeból Mane kontinua fó oportunidade ba jogadór foin-sa’e sira husi munisípiu oioin atu hatudu sira-nia kapasidade no talentu iha modalidade futeból.
Iha kompetisaun ne’e, ekipa mane husi Munisípiu Oecusse sei hasoru ekipa Dili Oeste, enkuantu ekipa Viqueque sei hasoru ekipa Aileu.
Enkontru entre Oecusse no Dili Oeste sei sai oportunidade importante ba ekipa rua atu buka rezultadu pozitivu no kontinua avansa ba faze kompetisaun tuirmai.
Enkuantu Viqueque no Aileu mos sei disputa ho intensaun atu hatudu dominasaun iha kampu, liuhusi organizasaun ekipál, forsa defensiva no kapasidade atakante.
Kompetisaun Kopa Juvenil ne’e importante tebes ba dezenvolvimentu futeból Timor-Leste, tanba fó oportunidade ba jogadór joven sira atu dezenvolve abilidade téknika, tátika no esperiénsia kompetisaun.
Aleinde ne’e, kompetisaun ne’e mos sai fatin ida atu buka no identifika talentu foun ne’ebé bele kontribui ba futeból nasional iha futuru.
Tuir orariu jogu nebe mak iha, jogu ne rasik sei realiza iha Terça feira 10/11/2026 iha kampo FFTL, no jogu primeiru entre ekipa Oecusse VS Dili Oeste ho oras tuku 16:00 OTL no jogu segundu entre Viqueque VS Aileu ho oras tuku 18:30 OTL.
(leo)
