DÍLI, STLTIMORLESTE.com – Prezidente Repúblika, José Ramos-Horta, esplora kooperasaun ho ANPAS Itália atu hametin protesaun sivíl no kapasidade resposta emerjénsia iha Timor-Leste.
Enkontru ne’e hala’o iha Otél Tangla, Segunda 09/11/2026 ho Diretór ANPAS Itália, Gabriele Marino Noberasco, no reprezentante lideransa OLIDATA. Prezidente akompaña hosi Embaixadora Lurdes Bessa no Embaixadór Nelson Santos.
Iha enkontru ne’e, Marino Noberasco aprezenta proposta ANPAS nian atu dezenvolve programa formasaun protesaun sivíl, resposta ba dezastre naturál no asisténsia emerjénsia médika iha Timor-Leste.
Proposta ne’e foka ba formasaun sidadaun lokál sira atu sai pesoál resposta inisiál (First Responders), liuliu iha komunidade rurál ne’ebé iha asesu limitadu ba infraestrutura no servisu emerjénsia.
Programa ne’e iha objetivu atu fó kapasidade ba komunidade sira hodi responde lalais ba situasaun krize, inklui dezastre naturál no emerjénsia médika, atu bele salva vida ema nian.
ANPAS, organizasaun voluntariadu no umanitária Itália nian ne’ebé harii iha 1904, aprezenta inisiativa ne’e nu’udar dalan ida atu kontribui ba dezenvolvimentu kapasidade nasionál Timor-Leste nian.
Enkontru ne’e remata ho kompromisu atu kontinua kolaborasaun entre ANPAS no Governu Timor-Leste, ho objetivu implementa programa formasaun protesaun sivíl iha futuru.
Diretór ANPAS, Gabriele Marino Noberasco hatudu prontidaun atu servisu hamutuk ho Governu Timor-Leste hodi implementa programa formasaun protesaun sivíl no resposta emerjénsia.
(eme)
