DILI, STLTIMORLESTE.com – Prezidente Repúblika (PR), José Ramos Horta hato’o sentidu komferensia ba Polónia hafoin atake Trajiku iha Krakow.
Prezidente Repúblika no Laureadu Nobel ba Pás, Jose Ramos-Horta, hato’o kondolénsia profunda no solidariedade sinsera nasaun nian ba Repúblika Polónia hafoin atake trájiku iha sentru istóriku Krakow nian iha loron-sábadu, 7 fulan-novembru tinan 2026, ne’ebé hamate ema na’in-neen no hakanek ema na’in-sanulu-resin-lima, inklui ofisiál sira ba lei no orden nian..
Iha karta ofisiál ba Prezidente Repúblika Polónia, Karol Nawrocki, ho data 9 Novembru 2026, ne’ebé STL asesu Kuarta (11/11/2026), Prezidente Ramos-Horta hato’o simpatia povu Timor-Leste nian ba família vítima sira no ba sira hotu ne’ebé afetadu husi trajédia ne’e.
Ha’u hato’o ba Exelénsia, ba família vítima sira-nian, no ba povu Repúblika Polónia sentidu kondolénsia profunda no solidariedade sinsera Timor-Leste nian hasoru trajédia todan ida-ne’e. Iha tempu lutu no sofrimentu ida-ne’e, ha’u hakarak espresa ami-nia kompaixaun partikulár ba familia sira ne’ebé lakon sira nia ema ne’ebé sira hadomi, inklui sidadaun estranjeiru sira ne’ebé sai vítima ba aktu violénsia ida-ne’e, no hato’o ami-nia dezeju ba rekuperasaun lalais no kompletu ba sira hotu ne’ebé kanek. Timor-Leste kondena maka’as aktu violénsia no estremizmu hotu-hotu ne’ebé ameasa vida umana, dignidade umana, no seguransa komunidade sira nian. Ami reafirma ami-nia konviksaun katak pás, respeitu ba direitus umanus, no solidariedade entre povu sira mak valór fundamental sira ne’ebé tenke proteje no promove husi nasaun hotu,” dehan PR Horta.
Prezidente Ramos-Horta espresa rekoñesimentu ba korajen no espíritu servisu ofisiál polísia sira ne’ebé halo intervensaun hodi prevene konsekuénsia sira ne’ebé grave liután, no mós dedikasaun estraordinária husi profisionál saúde sira ne’ebé, maski iha sirkunstánsia perigu estremu, fó asisténsia imediata ba vítima sira, hodi hatudu kompromisu kle’an ba prezervasaun vida umana.
Prezidente hein katak, família enlutada sira bele hetan forsa no konfortu iha momentu tristeza boot ida-ne’e, no katak povu Polónia bele ultrapasa trajédia ida ne’e ho korajen unidade no esperansa.
(eme)
