BAUCAU, STLTIMORLESTE.com – Autoridade Munisipál Baucau bá ona Aldeia Alawa, Suku Alawa Kraik, Postu Administrativu Baguia, Munisípiu Baucau, atu entrega apoiu nesesidade bázika ba família vulnerável, Maria Rodrigues, idade 75, no nia la’en, Lorenso Ximenes, idade 72.
Sekretária Munisipál Asuntu Sosial no Organizasaun Komunitária, Maria Celestina Viegas, hateten katak Autoridade Munisipál Baucau, liuhusi Sentru Solidariedade Sosial Munisipál Baucau, halo ona viajem bá fatin Alawa hodi entrega apoiu nesesidade bázika ba família refere.
“Kona-ba asuntu ne’e, Autoridade Munisipál Baucau koordena ona ho Sentru Solidariedade Sosial Munisipál Baucau. Daudaun ne’e, ekipa iha ona dalan atu bá Baguia, Suku Alawa Kraik, hodi fó apoiu nesesidade bázika uitoan ba komunidade ne’e,” Maria Celestina Viegas hateten ba STL, iha Vila Nova, Baucau, Kuarta (11/11/2026).
Enkuantu kona-ba nesesidade konstrusaun uma ba família refere, nia hateten katak Autoridade Munisipál Baucau koordena ona ho Sentru Solidariedade Sosial Munisipál Baucau atu hato’o pedidu ba Ministériu Solidariedade Sosial no Inkluzaun (MSSI), hodi apoiu materiál konstrusaun ba família refere.
Tanba Maria Celestina subliña katak, Servisu Asuntu Sosial Munisipál Baucau la iha orsamentu espesífiku atu konstrui uma ba família vulnerável sira. Tanba Instituisaun ne’e rekursu limitadu liuhusi Asaun Sosial, ne’ebé destina ba apoiu ai-han no la’ós ai-han ba família vulnerável sira ne’ebé identifika.
“Ba Asuntu Sosial Baucau, ita la iha orsamentu atu halo konstrusaun uma ba família vulnerável. Ita iha de’it item ida husi Diresaun Asaun Sosial atu apoiu ai-han no la’ós ai-han ba família vulnerável sira, tanba ita nia orsamentu limitadu no la iha osan própriu atu konstrui uma ba família sira ne’ebé presiza ita nia tulun,” nia afirma.
(tom)
