DILI, STLTIMORLESTE.com – Prezidente Bankada FRETILIN, Aniceto Longuinhos Guterres Lopes, husu Governu atu investe iha rezerva kombustível nasionál hodi hamenus dependénsia ba kompania privadu.
Aniceto hato’o pedidu ne’e durante debate proposta Orsamentu Jerál Estadu (OJE) 2027 iha Parlamentu Nasionál, kuarta-feira (11/11/2026).
Nia propoin atu Governu hahú investimentu iha infraestrutura armazenamentu kombustível iha tinan 2027.
Aniceto lembra katak, FRETILIN propoin ona medida hanesan iha debate orsamentu retifikativu tinan kotuk, hodi muda prioridade no hametin reziliénsia nasionál.
Nia mós husu esplikasaun kona-ba gastu besik US$200 millaun ba kompania privadu atu sosa no fó subsídiu kombustível.
“Tanbasá Timor GAP ne’ebé Estadu fiar atu dezenvolve Greater Sunrise la bele ajuda Estadu atu sosa no fa’an kombustível iha merkadu doméstiku?” Aniceto husu.
Prezidente Bankada FRETILIN ne’e kompara kapasidade kompania privadu ETO ho Timor GAP iha área kombustível.
Nia afirma katak, ETO nia kapasidade iha área ne’e boot liu kompara ho Timor GAP.
Aniceto konsidera katak kriasaun rezerva kombustível nasionál bele sai medida importante atu hametin seguransa enerjétika no hamenus dependénsia ba setór privadu.
Iha parte ikus, nia apela ba Governu, bankada parlamentár no sidadaun hotu atu hamutuk korrije erru no frajilidade ne’ebé nasaun hasoru.
Nia enfatiza katak koreksaun tenke hahú agora, liuliu liuhosi proposta OJE 2027, hodi transforma realidade povu nian ba futuru ne’ebé di’ak liu.
“Hamutuk ita bele!” nia konklui.
(alb)
