DÍLI, STLTIMORLESTE.com – Juventude hetan enkorajamentu atu aprende husi istória pasadu, preserva valor di’ak no prepara an hodi harii futuru sustentável ba sira-nia moris no nasaun.
Mensajen ne’e hato’o husi sobrevivente Masakre Santa Cruz 1991, João António Dias, durante Semináriu Nasionál ho tema “35 Anos Masakre Santa Cruz, Reorientasaun Papel Juventude no Restaurasaun Valor Identidade Nasionál”, iha Salaun UNDIL, Tersa (10/11/2026).
Iha ninia intervensaun, João António Dias husu juventude sira atu haree fila-fali ba istória pasadu, aprende husi esperiénsia jerasaun uluk, kontinua preserva buat di’ak ne’ebé sira halo ona no hadia hahalok ne’ebé la di’ak.
Nia esplika katak, buat di’ak ne’ebé aman, avo no tiu sira halo ona, juventude tenke kontinua dezenvolve, enkuantu buat ne’ebé aat tenke husik no la repete fali iha futuru.
“Futuru iha imi-nia liman rasik. Se imi la hadia hahalok no la hahú hakat hosi ohin, imi sei la hetan futuru ne’ebé di’ak,” dehan João António Dias.
Nia mós enfatiza katak, estudante sira tenke fó atensaun no dedikasaun maka’as ba estudu, tanba edukasaun sai hanesan dalan importante atu atinji objetivu no realiza sira-nia mehi iha futuru.
Tuir nia, estudante sira ne’ebé konsege dedika 95% ba estudu iha tempu agora, iha oportunidade boot atu prepara no atinji futuru ne’ebé di’ak.
Nia subliña katak, futuru la mai rasik ka hein de’it iha oin, maibé depende ba esforsu, preparasaun no asaun ne’ebé juventude halo hahú hosi ohin loron.
Iha rohan, sobrevivente Masakre Santa Cruz ne’e enkoraja juventude sira atu aprende husi istória pasadu, hadia buat ne’ebé presiza hadia no kontinua hakat ba oin, hodi kontribui ba dezenvolvimentu nasaun.
(joa)
