DÍLI, STLTIMORLESTE.com – Prezidente Republika (PR), José Ramos-Horta no António Costa diskute hametin kooperasaun bilaterál entre Timor-Leste no Uniaun Europeia.
Prezidente Repúblika, José Ramos-Horta, hala’o enkontru bilaterál ho Prezidente Konsellu Europeu, António Costa, iha Bruxelas, Béljika, durante vizita servisu iha loron-tersa.
Enkontru ne’e foka ba hametin relasaun institusionál no habelar kooperasaun entre Timor-Leste no Uniaun Europeia (UE), liuliu iha área polítika, ekonómika no dezenvolvimentu sustentável.
Tuir komunikadu ne’ebé STL asesu iha Kuarta-feira, 11 Novembru 2026, enkontru ne’e reprezenta esforsu diplomátiku atu transforma solidariedade istórika Europa nian ba parseria estratéjika ne’ebé orienta ba futuru.
Líder rua ne’e mós analiza kooperasaun ne’ebé hala’o ona, inklui akordu finansiamentu foun ho montante €9 millaun, ne’ebé asina iha Maiu 2026.
Akordu ne’e destina atu apoia digitalizasaun sistema judisiál Timor-Leste nian no promove negósiu sustentável iha setór ekonomia sirkulár.
Iha enkontru ne’e, sira mós aborda oportunidade kooperasaun foun depois Timor-Leste adere ba ASEAN iha Outubru 2025.
Timor-Leste nia partisipasaun ativa iha Akordu Samoa entre Organizasaun Estadu Afrikanu, Karibenhu no Pasífiku (OACPS) ho UE mós sai pontu importante iha diálogu ne’e.
Parseria ne’e iha objetivu atu hametin kooperasaun inter-rejionál iha área polítika, ekonómika no multilaterál entre Timor-Leste no parseiru sira iha Europa.
(eme)
