DILI, STLTIMORLESTE.com – Iha loron Tersa dadersan (21/07/2026), Diretor Ezekutivu Agensia Dezenvolvimentu Nasional (ADN), Januario M. Guterres hasoru Xefe Governu Timor Leste (TL) iha IX Governu Konstitusioal, lidera husi Primeiru Ministru (PM), Kay Rala Xanana Gusmão, iha Palasiu Governu, hodi informa kona-ba progresu servisu no implementasaun projetu infraestrutura Governu nian iha territoriu nasional.
Iha enkontru nee, Diretor ADN, Januario M. Guterres hatoo ba Xefe Governu kona-ba prosesu verifikasaun no inspesaun ba projetu infraestrutura sira neebe ADN halao iha Teritoriu Nasional, atu asegura obra, implementa obra sira nee tuir padraun tekniku, orsamentu no prazu neebe determina.
Ih biban nee mos Diretor ADN husu ba Xefe Governu atu lidera serimonia abertura treinamentu tekniku ba Programa Dezenvolvimentu Integradu Munisipiu (PDIM) no Programa Nasional Dezenvolvimentu Suku (PNDS) neebe ADN sei organiza ba tekniku sira iha munisipiu 13 inklui Rejiaun Administrativa Espesial Oecusse Ambeno (RAEOA).
Nia dehan, treinamentu nee ho objetivu atu hasae kapasidade tekniku sira iha prosesu planeamentu, verifikasaun, inspesaun no akompanhamentu ba implementasaun projetu infraestrutura iha nivel munisipiu no suku.
“Ita husi ADN, iha knaar atu planeia, prepara no monitoriza projetu infraestrutura estratejiku Governu nian, halo estudu tekniku no dezenhu no koordena ho ministeriu, ajensia Governu inklui parseiru dezenvolvimentu sira, atu garante implementasaun projetu ho kualidade no efisiensia.
Iha fatin seluk, Domingos Noronha nuudar Akademista husi Universidade Nacional Timor Lorosae (UNTL), Fakuldade Ekonomia dehan, ADN nia papel nee importante atu kontrola projetu sira neebe finansia husu governu atu garante kualidade obra estadu ho diak.
“Ami husi parte Akademia, husu ba Diretor Ezekutivu ADN ho Estrutura tomak, hahu husi Kapital Dili too Munisipiu 13 inklui RAEOA, atu kontrola obra estadu neebe mak finansia husi governu, atu asegura kualidade obra sira nee, tanba osan estadu neebe governu gasta ba obra sira nee tenke iha kualidade, atu nunee fo benefisiu ba povu iha tempu naruk, laos sistema bongkar pasang, nee la diak,” dehan Domingos.
Antes nee Xefe Suku Costa, Francisco Colo dehan, daudaun iha ninia suku hetan projetu ida mak nahe sumentu ba estrada iha Bairru Cruz ho moru protesaun ba mota kiik Bolkenat.
“Ami nuudar Autoridade lokal.nafatin garante obra estadu iha area urbana, liu-liu iha Suku Costa nian iha tinan 2026, liu husi Programa Nasional Dezenvolvimentu Suku (PNDS) atu fo benefisiu ba povu iha tempu naruk, tanba nee kada loron ami sempre tun iha terenu hodi monitoriza obra estadu atu garante ninia kualidade,” dehan nia.
(jos)
