BAUCAU, STLTIMORLESTE.com – Komunidade afetadu ba projetu reabilitasaun estrada urbana Baucau Vila, husu Governu atu aselera prosesu indemnizasaun.
Komunidade afetadu iha Aldeia Lutumutu, Suku Tirilolo, Postu Administrativu Baucau Vila, Munisipiu Baucau, Juvinal Abut aprezenta, iha fulan hirak liu ba Governu liu husi ekipa Nasional halao ona enkontru ho komunidade afetadu sira ba projetu reabilitasaun estrada urbana Baucau Vila, iha neebe liu husi enkontru refere parte komunidade afetadu ho Governu iha ona aseitasaun ho karta.
“Karta aseitasaun iha ona maibe osan nee prosesa ona ga seidauk, lao oinsa ona karik ami mos seidauk hatene. Prezisa aselera indemnizasaun, tanba horibainhira entre ami ho Obras Publikas halo tiha ona,” hateten Abut ba STL iha Tirilolo Baucau Vila, Tersa (11/08/2026).
Nia haktuir, husi aseitasaun refere parte Governu prontu fo indemnizasaun ho osan tuir momentante uma nian ba komunidade afetadu sira, maibe montante orsamentu parte komunidade afetadu seidauk hatene inklui nia prosesu sira.
Abut aprezenta, nia parte sai afetadu ba projetu reabilitasaun estrada urbana refere ho uma hela fatin, tuir lo-loos nia parte seidauk sobu, tanba tuir karta aseitasaun, maibe obriga husi Ministeriu Obras Publikas, nunee hanesan sidadaun Timor oan kontribui sobu ona uma refere, maibe too ohin loron seidauk iha indemnizasaun.
Iha fatin seluk, Prezidente Konselhu Munisipal Kombatentes Libertasaun Nasional Baucau, Cornelio Gama “L7” apresia ho komunidade afetadu sira iha Munisipiu Baucau nia kolaborasaun ba iha projetu reabilitasaun estrada urbana, tanba durante prosesu lao too ohin loron laiha impedementu. Maibe husu Ministeriu Obras Publikas atu responde mos sira nia preokupasaun.
“Estadu tenke fo uluk indemnizasaun, maibe uma sobu ona Estadu tenke hatene tanba sira nia oan eskola hela iha fatin ida, ita tenke respeita sira nia dignidade, tanba sira neebe mai hela iha Baucau, balu husi Lospalos Viqueque se sira nia uma sobu sira hela iha neebe,” L7 hateten.
Tuir Komadante FALINTIL nee katak, loloos Governu atribui uluk indemnizasaun ba komunidade afetadu sira, nunee komunidade hirak nee bele harii sira nia uma hela fatin iha fatin seluk ho dignu, maibe Governu seidauk atribui indemnizasaun no haruka sobu ona sira nia uma fo impaktu ba labarik estudante sira, nee hanesan la respeita ema nia dignidade.
Enkuantu reprezentante Governu Sentral iha Munisipiu Baucau, Prezidente Autoridade Munisipiu Baucau, Veneranda Lemos komenta, prosesu indemnizasaun responsabilidade tomak iha Governu Sentral atu responde.
“Saida mak hau bele hateten iha nee katak, la hetan indemnizasaun nee lae, indemnizasaun nee direitu ida idak nian sei hetan, mais atu bainhira nee hau labele responde,” Veneranda katak.
Mezmu nunee, Eis deputada nee husu komunidade afetadu sira atu kontinua kontribui iha prosesu reabilitasaun estrada refere liu husi voluntariamente sobu ida idak nia uma hela fatin, moru protesaun no seluk tan, nunee progresu servisu bele atinji tuir kontratu neebe estabelese ona. Maibe Veneranda garante, Baucau oan hakarak dezenvolvimentu, tanba nee sei la impede no halo asaun hasoru prosesu reabilitasaun estrada refere.
(tom)
