DILI, STLTIMORLESTE.com – Daudaun nee ai-moruk reazente ba moras hepatites iha armazen sentral stok mamuk hela, kuaze semana ida nia laran ona, ho ida nee Institutu Nasionàl Farmasia Produtu no Médika (INFPM) rekonhese.
“Kona-ba ai-moruk reazente ba moras hepatites daudaun stok mamuk hela, maibe prosesu kompras lao hela no espera katak iha tempu badak bele kompras ona para bele responde ba ezijensia sira husi fasilidade saúde sira,” Diretór Interinu iha Institutu Nasionàl Farmasia Produtu no Médika (INFPM), Miguel Soares ba jornalista sira iha nia knaar fatin Kampung Alor, Kuarta (10/06/2025).
Nia dehan, kona-ba stok mamuk nee kuaze semana rua resin ona, tanba nee prosesu kompras daudaun lao hela.
“Stok ba reazente ida nee kuaze iha semana rua ona, karik la sala neebe prosesu agora lao hela ita hein deit,” nia esplika.
Nia deklara, kona-ba stok out nee husi INFPM nafatin tau konsiderasaunn nunee bainhira stok too mai iha armazen sentral sira bele distribui kedas ba fasilidade saude sira ne’ebé mak hato’o pedidu ba iha INFPM.
“Enprinsípiu infomasaun sira neebe liga ba stok out ami parte INFPM sempre akapta hodi tau konsiderasaun imediata ba prosesu distribuisaun. Bainhira reazente nee too mai ami sei halo kedas distribuisaun,” nia informa.
Tuir nia katak, bainhira kompaña sira neebe mak kompras tarde mak INFPM sei foti desizaun hodi kompras emerjensia ho kuantidade neebe mak natoon.
“Se karik mai mak tarde oituan hakarak ka lakohi ami Konselhu tekniku husi INFPM deside para halo kompras emerjénsia ho kuantidade natoon para uza ba nesesidade urjenti hodi distribui ba fasilidade saude sira,” nia deklara.
Iha fatin hanesan, pesoal saude ho inisial JDSM informa, stok reazente mamuk kuaze fulan lima (5) ona, tanba nee dala ruma iha pasiente balun presiza urjente atu hasai raan ba moras ida nee labele, tanba daudaun nee stok mamuk hela.
“Reazente ida nee mamuk kleur ona, hodi bainhira ba foti iha Vera Kruz, mais iha neeba mos la iha ona, nunee husu ba INFPM mos dehan iha neeba la iha ona, neebe ita atu koalia oinsa,” nia informa.
Nia haktuir katak, reazente iha mos ai-moruk importante balun mos stok out hanesan multi-vitamina, paracetamol sirup no seluk tan inklui ai-moruk ba kanek nian.
“Iha nee lais, ida nee deit iha mos ai-moruk lubuk ida mos la iha tanba nee dala ruma pasiente mai ita haruka ba foti fali iha fatin seluk, lae haruka rai nomor telefone kuandu tama ami telefone ba sira no sira mai foti, kuandu labele los ona obriga tenke haruka sira ba sosa rasik tanba iha nee mamuk duni nee,” nia afirma.
(jen)
