DILI, STLTIMORLESTE.com – Servisu Edukasaun Munisipiu Ainaro iha semana kotuk submete ona dadus estudantes finalista husi eskola sira iha Munisipiu Ainaro ba Ministeriu Edukasaun (ME), liu husi Diresaun Nasional Kurríkulu.
Diretor Servisu Edukasaun Munisipiu Ainaro, Patricio da Costa Magno hatete katak, dadus estudantes finalista rihun rua resin husi eskola sira iha Munisipiu Ainaro, submete ona ba ME, hafoin hala’o enkontru ho dirijente sira iha Ministeriu Edukasaun.
“Ensinu baziku nian, ita iha estudantes finalista total 1.459, Ensinu Tékniku-Vokasional (Tek-Vok) 99, no Sekundáriu Jerál 994. Nee husi kada nivel. Agora dadus total nee ita presiza sura fali tan. Hau hanoin total rihun rua resin mak sei partisipa iha ezame nasional ba tinan ida nee,” dehan Patricio da Costa Magno ba STL liu husi via telefone, Tersa nee (08/09/2026).
Nia hatete katak, enkontru ne’e hala’o iha semana kotuk, no iha enkontru refere sira diskute kona-ba preparasaun ba Ezame Nasional. Hafoin ne’e, Servisu Edukasaun Munisipiu Ainaro mos hala’o enkontru ho diretór eskola sira husi Ensinu Baziku, Tek-Vok no Sekundáriu Jerál.
“Ita orienta ona sira atu bele fó apoiu no liu tan ba ita-nia estudante sira, hodi nune’e bele prepara diak liu tan ita-nia estudante sira. Tanba tuir kalendáriu edukasaun, ita sei hahu Ezame Nasional iha loron 19 fulan Outubru. Nee duni, ohin ita orienta ona ita-nia dirijente husi eskola ida-idak atu bele prepara ona estudante finalista sira,” hatete nia.
Tuir Patricio, kona-ba formasaun komisaun organizadora ba Ezame Nasional, eskola ida-idak sei kria nia komisaun rasik. Enkuantu, ekipamentu ka ekipa ba vijilánsia sei mai husi ME, ne’ebé sei koloka iha eskola ka sentru ezame nasional.
Nia mos konfirma katak, dadus estudantes finalista hotu-hotu submete ona ba ME liu husi Diresaun Nasional Kurríkulu.
Iha fatin seluk, Superintendente Edukasaun Munisipiu Dili, Cesarina Correia Guterres, hatete katak eskola ida-idak sei halo preparasaun no forma ekipa atu responsabiliza ba asuntu Ezame Nasional.
“Hau hanoin ida nee husi ita-nia eskola ida-idak sei halo preparasaun no forma ekipa ida ba Ezame Nasional nian,” afirma Cesarina.
Enkuantu, Diretór Nasional Ensinu Sekundáriu iha ME, Benjamin Gomes da Cruz Fernandes, hatete katak kona-ba asuntu dadus finalista, sei konfirma ho Diresaun Nasional Kurríkulu iha ME, tanba direzaun ne’e mak simu dadus estudantes finalista sira ne’ebé sei partisipa iha Ezame Nasional.
(jac)
