DILI, STLTIMORLESTE.com — Ekipa Konjunta husi Diresaun Servisu Investigasaun Kriminál (DSIK), Servisu Migrasaun (SM), Ekipa Forensik no Diresaun Servisu Informasaun Polísia (DSIP), kontinua halao aksaun kaptura kada loron kontra estranjeiru ilegal sira neebe aluga uma ba scam call center iha Dili, asaun neebe dudu uma nain sira atu matan moos liu tan hodi garante seguransa rai laran.
Observador Polítika, Antonio Magno, sublina katak fokalizasaun no inspesaun rutina iha fatin no uma aluga sira, nuudar aspetu krusial hodi hamate rede krime transnazional no proteje teritoriu nasionál husi atividade ilisita.
“Aksaun kaptura kontra estranjeiru ilegal sira nee kestaun seguransa nasional neebe seriu tebes. Uma nain sira presiza matan moos, verifika loloos identidade no objetivu husi estranjeiru sira neebe aluga uma, hodi la fo fatin ba rede krime transnazional atu subar no opera iha rai laran,” sublina Antonio Magno ba STL, iha Kolmera, Dili, Kuarta nee (12/08/2026).
Nia rekonese katak aksaun firme neebe hatudu husi DSIK, Servisu Migrasaun, Forensik, no DSIP fo ameasa forte ba grupu pratika jogu online no scam call center sira, enkuantu hametin seguransa rai laran no proteje estabilidade nasional.
Iha parte ketak, Akademista husi Universida Nasionál Timor Lorosa’e (UNTL), Luciano da Silva, hatete katak prezensa estranjeiru ilegal sira neebe opera scam center no jogu online, bele Fo imfaktu aat ba imajen rai laran no ekonomia nasional.
“Sidadaun hotu no autoridade sira presiza hamutuk hodi matan moos ba movimentu sospeitu sira nee, tanba kestaun seguransa rai laran nian laos deit kargu ba orgaun seguransa, maibe responsabilidade ba sidadaun hotu-hotu,” hatete Akademista UNTL, Luciano da Silva.
Luciano hatutan, governu no orgaun kompetente sira presiza foti pasu legal neebe rigoruza hodi duni sai no fó kastigu todan ba estranjeiru sira ne’ebé violu lei estatutu migrasaun nian, hodi fo ameasa forte ba rede krime transnazional sira neebe hakarak halo Timor-Leste nuudar fatin operasaun ilísita.
Entretantu, Ekipa Konjunta husi Diresaun Servisu Investigasaun Kriminál (DSIK), Servisu Migrasaun (SM), Ekipa Forensik, no Diresaun Servisu Informasaun Polísia (DSIP) kada loron kontinua intensifika sira nia aksaun hodi kaptura sidadaun estranjeiru sira neebe deskonfia hela no servisu ilegal. Aksaun kaptura nee foka liuliu ba sidadaun husi Xina no nasaun seluk tan neebe nain ba scam center no jogu online, ho alvu laos deit iha kapital Dili maibe alastra mis ba munisípiu balu. Aksaun no inspesaun surpreza sira nee susesu foti atensaun boot husi publiku no sai viral iha meiu sosial sira hanesan Facebook, TikTok, no plataforma dijital seluk tan, neebe hetan reasaun no suporta makaas husi sosiedade sivil hodi husu atu garante seguransa nasional ba oin.
(car)
