DILI, STLTIMORLESTE.com – Tribunal Judisial Primeira Instansia Dili (TJPID) halao prosesu primeiru interogatoriu ba arguidu ho inisial ZAdC, tanba deskonfia hadau telemovel.
Arguidu autoridade seguransa detein iha loron 12 fulan Agostu tinan 2026, iha gan 45 Hudi Laran, Suku Bairo Pite, Postu Administrativu Dom Aleixo, Munisípiu Dili.
Arguidu submete mai iha Tribunal, husi parte Ministeriu Publiku reprezenta husi Prokurador Bartolomeo De Araujo, promove ho krime Roubu neebe previstu iha artigu 253 husi Kodigu Penal Timor Leste nian.
Iha sala julgamentu laran Juiz turnu Ivan Patrocenio rona tiha arguidu nia deklarasaun, Tribunal husu ba iha Ministeriu Publiku no defeza atu tama ba iha alegasaun.
Iha alegasaun Prokurador turnu Bartolomeo de Araujo solisita ba iha Tribunal atu aplika medida Prizaun Preventiva ba arguidu.
Enkuantu husi parte defeza nian husu Tribunal atu aplika medida Aprezentasaun Periodika ba arguidu.
Rona tiha alegasaun, ikus mai Juiz turnu Ivan Patrocenio deside aplika medida Prizaun Preventiva ba arguidu.
Juiz deside aplika medida refere tanba konsidera iha indisus ba krime neebe MP promove mai iha Tribunal.
Hafoin despaisu Tribunal nian tun, defeza arguidu nian Defensor Publiku Fransisco deklara katak, nia parte la konkorda ho despaisu Tribunal nian.
“Hau la konkorda ho despaisu Tribunal nian, tanba nee hau sei halo rekursu ba iha Tribunal Rekursu hasoru despaisu Tribunal nian,” dehan Defeza arguidu nian.
Tuir observasaun STL nian, desizaun Tribunal nian tun arguidu lori kedan ba iha Prizaun Bekora.
Prosesu nee prezide husi Juiz turnu Ivan Patrocenio, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku Fransisco.
(ter)
