DILI, STLTIMORLESTE.com – Tribunal Judisial Primeira Instansia Dili (TJPID) iha loron Sesta (07/08/2026) deside aplika medida ba arguidu nain 3.
Arguidu nain 3 nee hanesan sidadaun Indianu ho inisial SS, VS no RS, neebe Ministeriu Publiku promove mai iha Tribunal ho krime Trafiku Umanu.
Iha despaisu Tribunal nian liu husi Juiz Turnu Ivan Patrocenio, deside aplika medida Prizaun Preventiva no Termo Indentidade Rezidensia (TIR) ba iha arguidu nain ida ho inisial VS, no ba arguidu nain rua ho inisial SS no RS Tribunal deside aplika medida Aprezentasaun Periodika (AP), medida Proibisaun Auzensia, no kontinua mantein ho medida TIR neebe antes nee iha ona.
Hafoin despaisu, Defeza arguidu VS nian, Advogadu Privadu Ruben deklara katak, nia parte la konkorda ho despaisu Tribunal nian, tanba nee nia parte sei halo rekursu ba iha Tribunal Rekursu tuir prazu loron 30 nia laran.
Antes nee, iha alegasaun Prokurador husu Tribunal atu aplika Prizaun Preventiva ba iha arguidu nain tolu, ho razaun arguidu sira hanesan sidadaun estranjeru atu labele akontese perigu de fuga.
Enkuantu husi defeza Ruben iha alegasaun husu Tribunal atu aplika medida Aprezentasaun Periodika (AP) no Termo indentidade rezidensia.
Prosesu primeiru interogatoriu nee, prezide husi Juiz turnu Ivan Patrocenio, Ministeriu Publiku reprezenta husi Prokurador Domingos Gouveia, arguidu nain tolu hetan asistensia legal husi Advogadu Privadu no Defensor Publiku.
Observasaun STL nian, arguidu nain tolu nee iha Tribunal koalia sira nia lian materna husi India nian, tanba nee iha tradutor nain rua mak halo tradusaun ba sira.
Rekorda katak, iha loron 3 fulan nee, Polísia Nasionál Timor Leste (PNTL) liu husi Diresaun Servisu Investigasaun Kriminal (DSIK), ezekuta mandadu detensaun neebe Tribunal Judisiál Primeira Instánsia Díli (TJPID) hasai ho NUK: 0215/26.PNSIC hodi detein sidadaun estranjeiru nasionalidade India nain 3 neebe suspeita envolve iha kazu trafiku umanu.
(ter)
