DILI, STLTIMORLESTE.com – Sekretariu Jeral Partidu FRETILIN, Mari Alkatiri konsidera Deputadu Bankada CNRT matan delek ona, tanba dun nia (Mari) uza atributu Partidu FRETILIN nian halo fiskalizasaun ba edifisiu Estadu nian foin lalais nee iha Munisípiu Kovalima.
Mari Alkatiri hatan kestaun nee relasiona ho Deputadu Bankada CNRT foin lalais nee kestiona nia, tanba utiliza atributu Partidu FRETILIN halo fiskalizasaun ba edifisiu Estadu nian iha Munisípiu Kovalima foin lalais nee.
“Hau ba hatais ropa mutin, hau tau tan sapeo ida hakerek liafuan Fundador Republika Demokratika Timor Leste, sira kritika hau nee sira nia matan delek karik,” hatete Mari Alkatiri ba jornalista sira iha edifisiu eis Titular, Farol, Segunda (03/03/2025).
Nia hatutan, deside hatais ropa mutin ba hospital tanba nia hatene atu ba hospital, tanba nee nia husu ba Deputadu Bankada Partidu CNRT atu haree didiak molok halo deklarasaun hasoru nia.
Maske nunee Alkatiri dehan, tuir Konstituisaun RDTL neebe iha hatete laiha ema ida kee bele manda partidu opozisaun uza ninia atributu hodi halo fiskalilizasun.
“Lahha, nee konstitusaun garante, sira hakfodak karik tanba sira abituadu, buat neebe akontese Sekretariu Jeral rasik mak ba oin, sira laran taridu karik sira koalia naran-naran deit. Agora hau mak hakarak tau mean, hau bele tau laiha ema ida atu manda hau,” hatete Sekretariu Jeral Partidu FERETILIN, Mari.
Antes nee Bankada CNRT iha Parlamentu Nasional (PN) kritika lider Partidu FRETILIN balu neebe utiliza atributu partidu nian hodi halo fiskalizasaun ba edifisiu Estadu nian.
“Hau louva tebes ba deputadu balu neebe sai defensor ba lei, maibe deskulpa deit hau akompanha iha media ita uza fali farda partidu nia mak ba fali halo fiskalizasaun iha orgaun Estadu nee hanusa mak nee, nee mak ema dehan ita politiza orgaun Estadu,” hatete Deputada Cedelizia Faria dos Santos.
(alb)
