DILI, STLTIMORLESTE.com – Antes nee Sekretariu Jeral Partidu FRETILIN, Mari Alkatiri hatete, Primeiru Ministru Kay Rala Xanana Gusmão sei rezigna aan, hatan ba kestaun nee Primeiru Ministru hatete, Alkatiri mak hatene nia (Xanana) atu rezigna aan.
Primeiru Ministru, Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika, Jose Ramos Horta iha palasiu Prezidensial Nicolaou Lobato, Bairo Pite, Kinta (07/03/2025).
Antes nee Sekretariu Jeral Partidu FRETILIN, Mari Alkatiri hatete, Primeiru Ministru sei rezigna aan, informasaun ida nee loos ka lae, hatan ba kestaun nee Primeiru Ministru, kay Rala Xanana Gusmão hatan katak, Sekretariu Jeral mak hatene nia rezigna aan.
“Ou nia mak hatene,? Alah ampunilah, ita bainhira hasoru malu ho sira dehan nusa Assalam Mua’laikum, se sira temi Assalam Mua’laikum, hau dehan walaikum salam, hau mak sala, nia mak hatene entaun nia mak hatene, mais ita nia, hau lakohi koalia buat sira iha nee hotu, tanba problema nee agora hau servisu atu dudu Estadu nia konstrusaun, formasaun de konstrusaun nee,” katak PM, Xanana.
Relasiona ho deklarasaun husi Sekretariu Jeral Partidu FRETILIN, Mari Alkatiri, neebe deklara katak, IX Governu Konstitusional la dura, no PM sei rezigna aan, Prezidente Republika (PR), Jose Ramos Horta hatete, diak liu ba haree beioan no partidu duke preokupa ho Governu.
“Sekretariu Jeral Partidu FRETILIN, Marí Bim Amude Alkatiri nusa la haree nia beioan sira, haree didiak partidu uma laran nee mos kuitadu, katuas tanan-tanan deit ona, joven laiha agora ba litik fali Avo Nana,” katak PR Horta.
Prezidente Republika hatete, tuir nia haree IX Governu neebe lidera husi Primeiru Ministru (PM) Kay Rala Xanana Gusmão servisu diak, no SekJer FRETILIN tuur deit tanba nee la haree.
Antes nee Sekretariu Jeral Partidu FRETILIN, Mari Alkatiri deklara mandatu IX Governu sei la dura, tanba tuir informasaun neebe nia asesu Primeiru Ministru sei rezigna aan iha tempu besik.
“Hau la fiar atu remata, tanba Governu ida nee sei iha remodelasaun, laos IX Governu ona maibe X Governu, tanba hau rona Primeiru Ministru atu rezigna aan, signifika IX Governu nia vida badak, maibe X Governu tenke iha Governu no orsamentu foun, tanba nee lalika hein IX Governu nee too tinan 2028,” hatete Mari Alkatiri.
(eme)
