DILI, STLTIMORLESTE.com – Sekretariu Jeral Partidu FRETILIN, Mari Alkatiri hatete, Timor Leste (TL) nafatin defende dignidade atu rezolve problema Naktuka neebe oras nee sai polemika.
Nia dehan, atu rezolve nafatin uza fronteira Kolonial nian, liu-liu markasaun sira neebe marka iha tempu português.
“Klaru iha tempu português marka tiha ona fronteira, tempu Indonezia rasik tim jeneral provinsi rejional nee nafatin fronteira uluk tempu português no Holanda nia, Indonezia mos la muda. Oekusi nee Oekusi, Kefa nee Kefa, Atambua nee Atambua, agora indepedensia tiha mak atu muda mota nee tama tan, se mota nee tama tan too pante Makasar halo nusa,” dehan Sekretariu Jeral Partidu FRETILIN, Mari Alkatiri ba jornalista sira iha konferensia imprensa neebe halao iha nia knaar fatin Farol, Dili, Kuarta (12/03/2025).
Nia hatutan, fronteira husi Maliana too Suai mak mota sira nee tama hotu halo nusa, ohin loron kordenada Geojefika se hakarak satelit mak fo laos SNI ba too iha neeba bosok ema.
“Akordu uluk nee la dehan mota tama halo nusa, se mota tama ba sira nia ita barani ba husu sira se tasi maran halo nusa, tasi maran nee fronteira ida tasi kuandu nakonu nee fronteira seluk lalika mai bosok povu, ema iha Indonezia rasik balu hatene saida mak dignidade, sira nia problema boot mak fronteira nee, maibe sira la hadau malu, sira laos fronteira ho ita deit,” katak Mari.
Mari hatutan, seidauk tama ba fronteira tasi nian komesa fo ona, fronteira rai maran fo ona ba sira nee prosesaun halo nusa.
“Hau hakarak deit mak nee, ita iha direitu ba indepedensia tanba Fronteira Kolonial, se lae ita mos parte ba Indonezia, ou Indonezia hola parte ba ita, laos sira boot ita mak hola parte deit ba sira lae, entaun tanba fronteira ita mos la hola parte ba sira no sira mos la hola parte ba ita nee mak realidade, tenke iha dignidade atu defende, laos barani deit dignidade,” katak nia.
Iha parte ketak, Embaixador Timor Leste ba Indonezia, Roberto Soares hatete, oras nee nasaun rua entre Timor Leste ho Indonezia iha hela negosiasaun nia laran, tanba nee tempu badak sei iha solusaun ba fronteira Naktuka.
(eme)
