DILI, STLTIMORLESTE.com – Visi Koordenador Partidu FRETILIN Munisipiu Manufahi, neebe ho knaar nuudar Deputadu husi Bankada FRETILIN iha Parlamentu Nasional, Antoninho Doutel Sarmento, afirma katak FRETILIN laiha kalkulasaun lo-loos kona-ba militante ka simpatizante hira mak la fo votu, tanba votus partidu nian iha Manufahi nunka tun, maibe sae ho numeru neebe kontinua aumenta iha kada eleisaun.
Lia hirak nee hatoo husi Antoninho Doutel Sarmento, hodi hatan ba dinamika polítika rai laran nian, hodi haktuir katak votante sira neebe hili mudansa iha objetivu boot ida deit ba FRETILIN.
“Razaun militantes, simpatizantes, no povu, fo ba mudansa mak ida deit, hakarak FRETILIN fila ba ukun tenke kombate analfabetizmu, kiak, no moras neebe nuudar inimigu boot povu Maubere nian. Sira hakarak hari’i infrastrutura ho kualidade, kombate korrupsaun, mafia, no fase osan foer iha rai laran, hamutuk ho justisa neebe loos ba ema hotu no justisa sosial neebe justu ba mehi ba povu nian,” Antoninho hateten ba STL liu husi WhatsAppp, Kuarta nee (19/08/2026).
Nia hatutan, FRETILIN nuudar organizasaun kontinua kaer metin demokrasia interna hodi hili kuadru estrutura sira husi baze—husi aldeia, suku, too Konferensia Postu no Munisipíu. Prosesu nee hakarak atu hatur kuadru sira neebe ho responsabilidade, korajen, no konsisténsia hodi hametin valor no prinsípiu libertasaun patria no libertasaun povu nian.
“FRETILIN iha nia knaar politiku, FRETILIN iha mos moral politika hodi hametin relasaun ho povu no hatudu solidariedade ba situasaun sira neebe merese hetan apoiu,” nia haktuir.
Iha biban nee, Deputadu nee esplika katak konsolidasaun, kontaktu eleitoral, no komunikasaun estruturadu husi baze ho militantes no povu, no liu husi Asembleia Jeral Militantes, Asembleia Suku, no Konferensia Postu ho Munisipiu nuudar xave forte ba partidu.
Konsolidasaun nee, tuir Antoninho, nuudar baze atu garante katak valor no prinsipiu FRETILIN nian kontinua suli tama fali ba povu nia isin no klamar, atu nunee kuandu FRETILIN fila fali ba poder, bele kombate obskurantizmu neebe sai nuudar inimigu boot povu Maubere nian.
Entretantu, hodi hatoo hanoin kona-ba dinamika nee, Observador Polítika, Jaime de Araujo, haree katak stratejia konsolidasaun husi baze neebe FRETILIN halao nuudar pasu fundamental ida hodi re-afirma fali sira nia baze eleitoral iha munisipíu sira. Tuir nia analíza, mensajen politika neebe fihir ba nesesidade bazika povu nian hanesan kombate kiak no hari’i infrastrutura bele sai meius ida, neebe efektivu hodi hatur fali orientasaun polítika partidu nian atu hatán ba ezijénsia povu nian iha nivel kraik.
“Hau haree katak, se partidu kontinua mantein sira nia aproximasaun neebe loloos ba baze hodi responde ba ezijénsia hirak nee, posibilidade atu manan hikas konfiansa povu nian sei sai boot liu tan iha futuru,” tenik Jaime hodi ramata nia koalia.
Nunee mos Akademista husi Universidade Nasionál Timor Lorosa’e (UNTL), Francisco da Costa, hato’o katak papél edukasaun polítika iha baze nu’udar pilar importante hodi foti konsiensia sivika no habelar konesimentu eleitor sira nian. Tuir nia haree, kuandu meius konstrusaun Partidu nian lao duni hamutuk ho edukasaun polítika neebe klean, povu sei sai kritiku liu tan hodi hili lideransa sira neebe iha kompromisu boot ba dezenvolvimentu nasional.
“Hau haree katak konsolidasaun iha nivel baze labele para deit iha konstrusaun estrutura partidu nian, maibe tenke lori valor akademiku no matenek sosial hodi eduka povu. Se nee lao ho susesu, eleitor sira sei haree partidu politiku nuudar mehi neebe loloos hodi lori mudansa no laos deit meius ida hodi soe votu iha eleisaun,” dehan Francisco.
(car)
