BAUKAU, STLTIMORLESTE.com – Autoridade Protesaun Sivil (APC – sigla português) Munisipiu Baukau husu Deputadu Florentino Ximenes da Costa “Sinarai” fo dadus vitima insendiu iha Suku Haekoni, Postu Administrativu Baguia, Munisipiu Baukau.
“Hau la hatene, ema vitima nee nia naran fo mai mak ami hatene buka tuir, nia atu iha rai kuak ga fatuk kuak ka nee ami buka tuir,” hatete Komandante Operasional Francisco Viana Freitas ba STL liu husi telefone, Kinta (19/12/2024).
Komadante neee esplika, kona-ba uma 3 neebe iha fulan Janeiru 2024 afeta insendiu iha Aldeia Uaiboru, Suku Haekoni, Postu Baguia, parte APC Baukau simu ona relatoriu fo ona apoiu emerjensia.
Maibe kona-ba ezijensia Deputadu Florentino Ximenes nian neebe hatete iha Parlamentu Nasional katak, vitima insendiu balun afetadu iha fulan Janeiru 2024 iha Suku refere seidauk hetan apoiu too ohin loron, parte APC Baukau husu Deputadu refere hatoo vitima sira nia identidade, tanba APC Munisipal rasik seidauk simu dadus kona-ba vitima insendiu neebe seidauk hetan apoiu.
Nunee mos Xefe Suku Haekoni, Luis Oliveira rejeita ho informasaun Deputadu refere kona-ba vitima afetadu insendiu daudaun toba deit iha lona okos. “Laiha, nee bosok karik,” hatete Luis.
(EST 2)
