DILI, STLTIMORLESTE.com – Selesaun Nasional Argentina konsege asegura bilhete ba final Kopa Mundial 2026, liu husi vitoria dramatiku 2-1 hasoru England, iha jogu semifinal neebe halao iha Estadiu Atlanta. Vitoria nee, lori fali kampiaun mundial 2022 ba konfrontu titlu Mundial, ba dá-la rua tuir malu.
England mak lidera uluk skor liu husi golu neebe marka husi avansadu Antony Gordon iha minutu 55, aproveita asistensia husi Morgan Rogers. Maske nunee, Argentina konsege hetan hikas iha minutu 85 liu husi xute forte husi liur lina area penalidade neebe ezekuta husi Enzo Fernandez.
Vitoria ba selesaun Argentina nee hametin liu husi golu kabesa husi Lautaro Martinez iha minutu 92, simu asistensia crossing husi kapitaun Lionel Messi. Golu nee mos sai hanesan pontu ikus neebe elimina tiha England husi kompetisaun.
Liu husi rezultadu nee, Argentina sei hasoru Espana iha jogu final neebe sei halao iha loron Domingu oin mai, enkuantu England joga fali fatin datoluk.
Entretantu Vitoria nee lori kedan ksolok ba adeptu sira iha Timor-Leste. Adeptu selesaun Argentina, José Ramos da Silva, hateten katak vitoria nee hatudu performansa aas no mentalidade kanpiaun neebe ekipa Argentina iha, maske hetan presaun uluk husi England. Nia fiar katak ho rezultadu nee, Argentina prontu ona atu mantein titlu iha final.
“Hau sente katak kualidade no esperiensia jogador sira nian, mak sai faktu boot ba Argentina hodi bele muda fali eskoru iha minutu ikus sira,” dehan José ba STL, Kinta nee (16/07/2026).
Nia hatutan, vitoria nee mos fo ksolok Adeptu Argentina sira iha Díli laran, neebe akompanha hela jogu semifinal nee liu husi ekaran boot sira. Nia mos hein katak jogu final mai, Argentina bele hatudu nafatin performansa neebe estavel, hodi lori fali tan troféu Kopa Mundial ba sira nia nasaun.
Iha parte seluk, lakon nee fo fali tristeza ba adeptu sira England nian. Adeptu selesaun England iha Timor-Leste, Antônio Tavarez hatoo nia sentimentu katak lakon nee susar tebes atu simu, tanba performansa diak neebe jogador sira hatudu ona iha minutu barak nia laran. Maske nunee nia nafatin fo parabens ba Argentina no hein katak, England bele hatudu fali nível jogu neebe aas hodi nain ba fatin datoluk iha jogu tuirmai.
Entretantu dinamika husi jogu semifinal nee mos hamosu reasaun boot husi utilizador media sosial sira. Status no komentariu oi-oin domina kedas plataforma media sosial hanesan Facebook no TikTok, liu-liu uza topiku Kopa Mundial 2026 nian. Diskusaun barak liu mak foka ba analiza tatika husi golu Enzo Fernandes, performansa fiziku jogador sira nian iha minutu kmanek, no mos predisaun ba joga final entre Argentina ho Espana neebe sai tiha topik trending global.
(car)
