DILI, STLTIMORLESTE.com – Tribunal Judisiál Primeira Instánsia Dili (TJPID) liuhusi primeiru interrogatóriu, deside aplika medida prizaun preventiva ba arguidu ho inisiál JDCD, iha kazu ne’ebé envolve vítima Palomita Gusmão Guterres.
Ministériu Públiku (MP) akuza arguidu ho krime omisídiu agravadu, ne’ebé prevee iha Artigu 139, no krime arma kro’at.
Arguidu lori ba tribunal iha loron Sábadu (21/11/2026), atu tuir prosesu primeiru interrogatóriu, ne’ebé prezide husi juís turnu, José Escurial.
Iha audiénsia, Prokuradór Alfonso López husu tribunal atu aplika medida prizaun preventiva ba arguidu. Enkuantu defeza, reprezenta husi defensora públika ida, husu tribunal atu aplika medida ne’ebé apropriadu.
Hafoin rona alegasaun husi Ministériu Públiku no defeza, juís turnu José Escurial deside aplika medida prizaun preventiva ba arguidu.
Depois despaisu tribunal nian, autoridade lori kedas arguidu ba Estabelesimentu Prizaun Becora.
Prosesu ne’e hala’o ho Prokuradór Alfonso López reprezenta Ministériu Públiku, enkuantu defensora públika ida fó asisténsia jurídika ba arguidu.
Tuir observasaun STL nian, família barak akompaña prosesu ne’e iha tribunal. Maibé, sira la simu desizaun autoridade seguransa nian ne’ebé lori arguidu ba Prizaun Becora liuhusi portaun kotuk tribunal nian, hafoin tribunal fó despaisu.
(ter)






