DÍLI, STLTIMORLESTE.com – Indonézia kontinua hametin kooperasaun ekonómika no diplomátika ho Timor-Leste, inklui apoiu ba dezenvolvimentu no aspirasaun lideransa ASEAN iha tinan 2029.
Lia hirak ne’e hato’o husi Enkaregadu Negósiu ad interim Embaixada Repúblika Indonézia iha Dili, Raden Sakunto Paksi, liuhusi diskursu iha selebrasaun amizade Indonézia ho Timor-Leste, iha Timor Plaza, Sábadu (21/11/2026).
Raden Sakunto Paksi hateten katak, relasaun ekonómika entre nasaun rua kontinua metin, ne’ebé hatudu liuhusi volume komérsiu iha tinan kotuk atinje besik US$424 millaun, aumenta liu porsentu ualu kompara ho tinan antes.
Nune’e, Indonézia kontinua sai parseiru komérsiu boot liu ba Timor-Leste.
Prezensa komunidade Indonézia no empreza sira iha Timor-Leste mós fó kontribuisaun pozitivu ba dezenvolvimentu ekonómiku no hametin sosiedade multikulturál.
Iha nivel rejionál, Indonézia kontinua fó apoiu ba partisipasaun no integrasaun Timor-Leste iha ASEAN, inklui aspirasaun Timor-Leste atu sai Prezidente ASEAN iha tinan 2029.
Nia afirma katak, apoiu Indonézia ba Timor-Leste kontinua iha kontestu bilaterál no rejionál, liuhusi asisténsia téknika no programa sira atu haforsa kapasidade nasaun nian.
Iha kooperasaun bilaterál, Raden Sakunto Paksi temi Memorandu Entendimentu ne’ebé Banco Central de Timor-Leste no Bank Indonesia asina iha fulan Setembru kona-ba sistema pagamentu no inovasaun finanseira dijitál.
Akordu ne’e sai etapa importante atu fasilita no acelera prosesu pagamentu entre nasaun rua. Bank Mandiri no Bank BRI, ne’ebé hala’o atividade iha Timor-Leste, mós bele kontribui ho sira-nia esperiénsia iha servisu ba emprezáriu no kliente sira.
Nia esplika katak, kooperasaun iha área teknolojia dijitál no servisu finanseiru bele kria benefísiu prátiku, apoia atividade ekonómika no hametin relasaun ekonomia entre nasaun rua.
Selebrasaun Loron Indonézia 2026 ne’e hala’o ho tema “Selebra Amizade Indonézia -Timor-Leste liuhusi Kooperasaun Ekonómika no Kulturál”.
Eventu ne’e halibur komunidade Indonézia no Timor-Leste, ho oportunidade ba emprezáriu sira atu aprezenta produtu no artista sira atu fahe sira-nia talentu.
Aleinde aprezentasaun kulturál no konsértu, programa ne’e mós inklui atividade doasaun raan no apoiu karitativu ba uma-kiak rua iha Timor-Leste.
Iha remata diskursu, Raden Sakunto Paksi hato’o agradese ba voluntáriu no parseiru sira, liuliu Timor Plaza, tanba apoiu ne’ebé fó ba realizasaun eventu ne’e.
Nia mós hato’o kondolénsia ba família tanba lakon Señora Lai Min Ha, inan husi Tony Jape no Alan Jape.
Nia konvida komunidade rua atu kontinua hametin amizade, aprofunda kooperasaun no avansa hamutuk ba oin, ho mensajen: “Hamutuk ita forte, hamutuk ita bele.
(joa)






