Ramos-Horta Simu Delegasaun WorldSkills Asia

Foto: STL/Emerenciana Pinto

DÍLI, STLTIMORLESTE.com – Prezidente Republika (PR), José Ramos-Horta simu delegasaun WorldSkills Asia atu hametin kooperasaun no dezenvolvimentu abilidade vokasionál ba joven Timoroan sira.

Prezidente Repúblika, José Ramos-Horta simu delegasaun kompostu husi reprezentante na’in-70 hosi WorldSkills Asia (WSA) no WorldSkills International, iha audiénsia kortezia iha Palásiu Prezidensiál, Sesta (20/11/2026)

Audiénsia ne’e organiza hosi Vise-Primeiru-Ministru, Francisco Kalbuadi Lay, hamutuk ho Institutu Nasionál ba Dezenvolvimentu Mão-de-Obra (INDIMO).

Enkontru ne’e realiza durante Timor-Leste sai uma-na’in ba Asembleia Jerál WorldSkills Asia, inklui reuniaun Komité Tékniku no Estratéjiku sira.

Prezidente WorldSkills Asia, Mubarak Saeed Al Shamsi, ba Jornalista hateten katak enkontru ne’e halibur membru WSA barak liu iha fatin ida, ho reprezentante hosi nasaun 19.

Nia afirma katak, audiénsia ho Prezidente Ramos-Horta hatudu apoiu governu Timor-Leste nian ba dezenvolvimentu edukasaun téknika no formasaun vokasionál.

“Audiénsia ho Prezidente Ramos-Horta reprezenta marka-pasu importante ida no hatudu apoiu maka’as governu ba dezenvolvimentu edukasaun foin-sa’e sira-nian,” dehan Dr. Mubarak Saeed Al Shamsi.

Durante vizita loron lima iha Timor-Leste, delegasaun ne’e mós interaje ho estudante no komunidade lokál, no apresia kultura, ospitalidade no kafé Timoroan.

Vizita ne’e reforsa oportunidade atu dezenvolve kapitál umanu no hametin parseiria internasionál iha área dezenvolvimentu abilidade vokasionál.

Delegadu sira mós manifesta interese atu kontinua vizita Timor-Leste iha futuru, hodi hametin relasaun no kooperasaun ho instituisaun lokál sira.

(eme)

Share it :

Leave a Reply

Your email address will not be published. Required fields are marked *