DILI, STLTIMORLESTE.com – Charge d’ Affairs of Republic Of India, Aridam Banerjee halo enkontru ho Prezidente Republika (PR), Jose Ramos Horta, hodi diskuti relasaun bilateral rai rua (2) entre Timor Leste ho India iha futuru.
Lia hirak nee hatoo husi Charge d’ Affairs of Republic Of India, Aridam Banerjee ba jornalista sira, bainhira remata enkotru iha Palasiu Prezidensial Bairo Pite, Sesta nee (20/12/2024).
“Ami halo enkontru ho exelensia, ami diskuti topiku balun, liu-liu relasaun bilateral entre Timor Leste ho India, iha hasoru malu nee koalia mos kona-ba foin lalais Prezidente vizita ba Bangladesh, nomos vizita ba India,” katak nia.
Charge d’ Affairs of Republic Of India, Aridam dehan, iha hasoru malu nee halo mos diskusaun seluk kona-ba projetu bilateral sira. Asuntu importante sira nee mak koalia ohin loron.
Nia katak, iha hasoru malu nee koalia mos kona-ba projetu balu neebe koko haree hamutuk iha futuru hanesan projetu infraestrutura balun.
“Balu iha projetu dijital ida neebe ami haree hela iha tempu neeba Prezidente propoin, tanba sei iha dezenvolvimentu infraestrutura barak iha fulan sira oin mai no tinan oin mai. Atu nunee ami bele kolabora ho India no TL sira bele kolabora. Atu hadia infraestrutura iha nee, nomos estudante mediku sira mai iha universidade mediku sira,” katak nia.
Nia hatete, iha hasoru malu nee koalia kona-ba topiku barak. Iha biban nee Xefe Estadu mos hatoo parabens ba Primeiru Ministru no bele vizita tinan oin mai. Nee mak buat neebe Prezidente hakarak propoin.
Nia dehan, oras nee daudaun Embaixada India iha ona. Nia mos hola parte iha Embaixada India iha neeba. Tanba nee, India loke ona embaixada ida iha Setembru tinan ida nee, no Timor Leste loke ona embaixada iha India, iha Outubru tinan ida nee.
Iha biban nee, Prezidente Republika Jose Ramos Horta mos hatoo benvindu ba Charge d’ Affairs of Republic Of India, Aridam neebe mak bele mai halo enkontru hodi koalia kona-ba relasaun bilateral entre TL ho India.
(eme)
