DILI, STLTIMORLESTE.com – Nuudar direjente husi Eskola Sekundariu Jeral 10 Dezembru Comoro, husu profesores no estudante sira tenke asegura nafatin livrus neebe rai iha biblioteka.
Diretor ESJ 10 Dezembru Comoro, Manuel Verdial ba jornalista STL iha nia knar fatin Comoro, Kinta nee (20/08-2026) dehan, sira iha biblioteka neebe mak iha ona, no husu oinsa mak profesores no estudantes sira nafatin asegura livrus neebe mak iha ona, sekuandu livrus balun neebe sei menus husu ba Ministeriu Edukasaun atu fo apoiu nafatin ba eskola.
“Nuudar diretor hau fo hanoin nafatin ba ita nian profesores nomos estudantes sira atu sira bele asegura nafatin ita nian livrus neebe mak iha biblioteka, bainhira estudantes sira asesu livrus hirak nee depois tau halo didiak fali, ita nian estudantes sira loro-loron asesu livrus sira nee iha biblioteka,” nia esplika.
Nia dehan, livrus ba kada disiplina iha biblioteka nee iha, maibe balun neebe seidauk sufusiente ba futuru husu apoiu nafatin ba Ministeriu Edukasaun, estudante sira nee tama iha biblioteka hodi lee livrus sira nee, bainhira lee remata sira bele tau didiak fali, tanba livrus sira nee presiza asegura ho diak.
Entretantu Diretor Eskola Sekundáriu Jeral FINANTIL, Aniceto Berlelo hatete, sira nian estudantes sira sempre asesu ba livrus neebe sira rai iha biblioteka no husi parte eskola nian nafatin asegura livrus sira nee ho diak.
“Ami nian estudantes sira sempre asesu ba livrus neebe sira rai iha biblioteka no husi parte eskola nian nafatin asegura livrus sira nee ho diak, atu nunee ita bele fasilita ita nian estudantes sira nee bele asesu diak ba livrus,” nia informa.
Entretantu fisiais biblioteka iha Eskola Sekundariu Jeral FINANTIL, Adilson Viegas Esperito Santos dehan, kuandu livru sira nee estudantes sira impresta loron tolu sira impresta livru Ida, maibe loron tolu sira tenke entrega fali livrus nee mai iha eskola. Fatin nee mak ladun sufisiente ba estudantes sira, tanba kada loron atende estudantes tolu nolu nunee, nee presiza.
Nia hatutan, biblioteka nee haree ba iha fatin neebe mak klot liu, sira mos presiza fatin neebe mak sufisiente, sira presiza hetan ajuda husi parte edukasaun nian hodi bele haree sira nian fatin biblioteka ninia.
Nunee mos Diretor EBC Manleuana, Carlos Correia katak, EBC Manleuana asegura livru iha biblioteka ho diak, hodi fo empresta ba estudantes lori ba uma, hafoin sira bele lori mai iha eskola.
“Ami nian biblioteka iha no livru hirak nee ami asegura diak liu tan iha biblioteka. Ita nian estudantes sira foti livru hakerek naran lori ba uma, depois sira lori mai fali eskola, nee semana ida, se lae ita nian estudantes sira lori livru nee ba estuda iha sala laran deit,” katak nia.
Carlos dehan, fo empresta livru ba estudantes lori ba uma too semana ida sira lori mai entrega fali, sira nian livru ba disiplina hotu kompletu no sira asegura diak livrus hirak nee iha biblioteka neebe mak iha ona.
Iha parte seluk, Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes dehan, ho livrus neebe iha eskola sira presiza asegura nafatin livrus sira nee, atu nunee estudantes sira bele asesu livrus sira nee, depois rai halo didiak iha biblioteka, nunee estudantes sira bele asesu ba livrus sira nee.
“Hau hanoin kona-ba livrus sira neebe mak husi ministeriu fahe ona ba ita nian eskola sira, nee ita nian direjente husi eskola ida-idak mak sei asegura livrus sira nee rai halo didiak iha biblioteka, para ita nian estudantes sira nee bele asesu ba iha biblioteka nee ho diak liu, nee duni eskola sira presiza duni atu asegura livrus sira nee,” nia dehan.
(jac)
