BAUKAU, STLTIMORLESTE.com – Asu ida tata joven feto Clementina Ximenes Correia, idade 23, iha Aldeia Betulale, Suku Tirilolo, Munisipiu Baukau, rezulta kanek todan atual baixa iha Hospital Rejional Eduardo Ximenes (HoREX) Baukau.
Clementina nia inan Lúcia Ximenes hateten, iha loron 16 Maiu parte dader, iha neebe vitima lao ain tuir dalan husi uma bairo SMU 01 Tirilolo atu ba rental iha estrada publiku Tirilolo nian printing domentus, maibe depente iha dalan asu refere atake nia tata iha parte ain loos, liman loos no karuk inklui mos tata iha vitima nia ibun rezulta ibun kulit parte leten nakles.
“Asu tata nee nia book aan labele foti fatuk tuda mos labele entaun tata iha nia ain liman ibun mak grave liu,” Inan Lúcia Ximenes hateten ba jornalista sira iha sala emerjensia HoREX Baukau, Sabadu (16/05/2026).
Nia sublina, hafoin asu halo reasaun atu tata vitima, parte vitima tenta atu halo auto defeza ba nia aan, maibe asu refere la fo fatin too tata vitima, rezulta kanek grave hafoin vitima kore aan husi asu fila ba uma.
Nia fundamenta, hafoin vitima too uma parte familia evakua kedas vitima ba Hospital Rejional Eduardo Ximenes (HoREX) Baukau hodi halo tratamentu.
“Nia ibun kanek todan nee suku ona pontu lima, maibe nia liman la suku tanba asu tata kona kedas nia urat maibe hetan ona vasina husi Hospital,” Inan Lúcia akresenta.
Liga asuntu nee, STL tenta konfirma parte mediku sira neebe fo tratamentu ba vitima refere, maibe lakohi fo komentariu, tanba razaun dirijente la aseita atu mediku sira fo komentariu ba kazu sira neebe atende iha sala emerjensia HoREX Baukau.
Iha fatin hanesan nain ba Asu, Leopoldina Maria Maya Belo hakfodak ho reasaun asu neebe tata Clementina Ximenes Correia, tanba antes nee asu refere nunka siak no atenu ema arbiru, maibe iha loron refere mosu reasaun oin seluk.
“Asu nee durante la siak, nia tun sae mos la siak, maibe ohin derepente tata nia kanek mai tiha Hospital nee mak ami mai tuir haree asu nee ohin baku mate tiha ona,” Leopoldina komenta.
Nain ba asu nee mos kontaktu ona ekipa veterinariu husi Servisu Munisipal Agrikultura Baukau atu ba identifika asu refere iha bairo SMU 01, Aldeia Betulale, Suku Tirilolo, Postu Baukau Vila no atual vitima Clementina Ximenes Correia baixa iha sala emerjensia HoREX Baukau.
(tom)
