Australia Entrega Salaun Memorial Ba Komando F-FDTL

Australia Entrega Salaun Memorial Ba Komando F-FDTL. (Foto: STL/Jeniche da Costa)

DILI, STLTIMORLESTE.com – Governu Australia liu husi Adidu Defeza Australia ba Timor Leste, Kapitaun Mar no Gerra, Matthew Richardson ofisialmente entrega Salaun Memorial neebe Australia rasik mak konstrui iha Sentru Instrusaun Komandante Nicolau Lobato (CICNL) Metinaro ba Komando FALINTIL-Forsa Defeza Timor Leste (F-FDTL) atu utiliza.

Nia dehan, Salaun Memorial nee konstrui empreza RMS Australia iha Timor Leste, hahu inisiu iha 14 Setembru tinan kotuk no termina entrega ona ba Komando F-FDTL.

Matthew Richardson esplika, Salaun Memoria ida nee nuudar vizaun husi Jeneral Falur ba nia membru F-FDTL no ba komunidade veteranus sira.

“Hau entrega Sala Memorial ho respeitu no agradesimentu boot. Australia iha istroria naruk, orgulhu no amizade ho Timor Leste,” hatete Adidu Defeza Australia Kapitaun Mar no Gerra, Matthew Richardson liu husi nia diskursu iha serimonia entrega salaun memorial ba Komando F-FDTL neebe iha Sentru Instrusaun Komandante Nicolau Lobato (CICNL) Metinaro, Sesta (31/01/2025).

Nia deklara, Australia sente ondradu hodi halo edifisiu ida nee nuudar testemunha ida ba amizada ida neebe dura no iha valor neebe kaer metin.

“Fatin nee atu fo ondra ba sira neebe mate ona. Ida nee mak fatin nee atu reflete ema hotu nia aspirasaun husi rezilensia ema kiik ida neebe atu atinji buat boot sira, liu husi unidade no determinasaun. Ida nee hatudu forsa extraordinária Timor Leste nian no ida nee hanesan lembransa ida ba ita hotu kona-ba saida mak ita bele atinji bainhira ita hamriik hamutuk,” nia informa.

Nia hatutan, edifisiu ida nee laos deit hanesan rekonhesimentu, edifisiu ida nee hanesan omenajen ida ba memoria, simbolu ba identidade ba sira neebe luta ba dignidade no auto determinasaun.

Iha fatin hanesan, Xefe Estadu Maior Jeneral F-FDTL, Tenente Jeneral Domingos Raul “Falur Rate Laek”esplika, Salaun Memorial ida nee atu fo ondra ba beiala sira, lider sira nian perkursu no harii nasaun oinsa ultrapasa kona-ba adversidade hodi harii Timor Leste neebe forti unidu no independente.

“Salaun Memorial ida nee hau nia intensaun atu estabelese valor no ideia sira ida neebe defini diresaun vertente ho ita nian nasaun,” nia dehan.

Nia agredese ba apoia Australia ba Timor Leste neebe konstrui Salaun Memorial ida neebe diak tebes, kooperasaun Timor Leste ho Austrlia sem duvida kontinua ba oin no sai belun diak hodi kontinua apoia Timor Leste iha kualker area inklui dezenvolvimentu forsa armada.

(jen)

Share it :

Leave a Reply

Your email address will not be published. Required fields are marked *