DILI, STLTIMORLESTE.com – Governu Australia hatudu nafatin prontidaun atu fo apoiu ba dezenvolvimentu Timor Leste (TL) iha aspetu hotu-hotu.
Kompromisu nee hato’o direta husi Vise Primeiru Ministru Australia, Richard Marles durante enkontru ho Primeiru Ministru (PM), Kay Rala Xanana Gusmão, iha Palásiu Governu, Kuarta (20/05/2026).
“Ami koalia kona-ba relasaun amizade entre Timor Leste ho Australia neebe diak tebes. Australia akompania hela Timor nia dezenvolvimentu. Sira hatene katak ita halo buat ruma maibe sei iha buat barak neebe presiza atu halo. Nuudar rai amigu ida sira prontu atu apoia ita bainhira ita persiza,” PM Xanana hateten liu husi nota komunikadu Imprensa neebe STL asesu husi media GPM.
Iha fatin hanesan, Richard Marles observa katak TL hanesan nasaun ida neebe nakonu ho paz no iha vizaun forte.
“Hau haree katak TL alkansa ona buat barak tebes kompara ho nasaun sira seluk neebe ninia jornada hanesan,” nia observa.
Australia prontu sai parseiru ida neebe besik-liu TL no hakarak asegura katak ida-nee akontese hanesan akordu kooperasaun ne’ebé estabelese ona iha area defeza.
Akompanha PM Xanana iha enkontru nee Ministru Negosiu Estranjeiru no Kooperasaun (MNEK), Bendito dos Santos Freitas, Ministru Petróleu no Rekursu Mineral (MPRM), Francisco da Costa Monteiro no Ministru Defeza (MD), Donaciano do Rosário Gomes.
(alb)
