BAUKAU, STLTIMORLESTE.com – Autoridade Administrasaun Munisipiu Baukau enkontru ho Autoridade Postu Administrativu 8 no Diretores Servisu Munisipal sira, hodi diskuti pakote fiskal Orsamentu Jeral Estadu (OJE) 2025.
“Ohin loron importante ba Munisipiu hotu konvoka reuniaun, entaun ohin Diretores Administrador Postu 8 mai rona simu sira nia pakote fiskal, tanba dekretu lei ezekusaun OJE 2025 nian sai ona,” hateten Prezidente Autoridade Munisipiu Baukau, Veneranda Lemos ba journalista sira iha Vila Nova, Sesta (10/01/2025).
Veneranda esplika, realiza reuniaun hodi diskuti pakote fiskal OJE 2025 refere, tanba bazeia ba dekretu lei Nu. 43/2024, kona-ba ezekusaun orsamentu tinan 2025 nian neebe alokasaun orsamentu hamutuk US$ 12.437.747 fahe ba kategoria 4, kompostu salariu no vensimentu, bens servisu, transferensia publika no kapital dezenvolvimentu.
Enkontru nee mos atu fo importansia ba kargu Diretor Servisu Munisipal sira hatene kona-ba dekretu lei refere neebe iha lalaok ezekusaun, hanesan mudansa ba viajen husi munisipiu ida ba munisipiu seluk mak liu distansia kilometru 10, nee presiza hetan autorizasaun husi Ministeriu Finansas.
Maibe viajen husi Munisipiu ba Postu Administrativu sira neebe pertense ba Baukau sei hetan fasilitasaun hanesan transporte inklui akomodasaun, tanba nee ba servisu ba area remotas.
Enkuantu Administrador Postu Kelikai Antiga, Fransisco Matias Gusmão “Junior” hatete, Administrador Postu no Diretores Servisu Munisipal sira simu ona pakote fiskal OJE 2025 nian neebe atu hahu ona halo ezekusaun.
Iha pakote fiskal OJE 2025 refere Administrasaun Postu Kelikai Antiga hetan alokasaun pur volta orsamentu rihun US$ 7 neebe sei responde ba tinan 2025 nian no tuir planu kada trimestral ezekuta orsamentu rihun US$ 1 resin.
(EST 2)
