BAUKAU, STLTIMORLESTE.com – Autoridade Munisipiu Baukau ofisialmente inaugura ona Uma Naroman ba Povu (UNP) hamutuk 10 no sala ba Eskola Ensinu Baziku 2 iha Suku Makalaku, Postu Administrativu Kelikai, Munisipiu Baukau.
“Ohin ho estrutura tomak mai halo inaugurasaun Uma Naroman ba Povu iha Makalaku hamutuk 10, obra husi Programa Nasional Dezenvolvimentu Suku (PNDS),” hatete PAM Baukau, Veneranda Lemos ba jornalista sira, hafoin halo inaugura UNP 10 iha Makalaku, Kinta (05/12/2024).
Tuir Veneranda, UNP nee finansia husi Programa Nasional Dezenvolvimentu Suku implementasaun servisu iha tinan 2022 no remata iha tinan 2024, neebe kompostu tipu 2 ho medida diferente mak hanesan tipu 6/1 kompleta kuartu 3 konstrui ho orsamentu rihun US$ 17 resin, enkauntu tipu 4/8 iha kuartu 2 konstrui ho orsamentu rihun US$ 16 resin.
Husi tipu 2 nee diferente iha kuartu toba fatin, tanba bazeia ba membru benefisiariu, maibe uma sira iha hotu sala 1, varanda 1 nomos dapur no hariis fatin, neebe kompleta kedas mobiliariu sira hanesan meza, kadeira, armariu no fasilidade dapur nian ba kada benefisiariu.
No nia konsidera mezmu uma refere konstrui ho simples, maibe dignu, nunee husu benefisiariu sira atu kuida ho diak hodi utiliza ba tempu naruk, tanba Governu no Estadu sei la konstrui tan uma ba benefisiariu neebe hetan ona, tanba sei iha problema barak neebe atu haree.
Iha fatin hanesan, benefisiariu Domingos Freitas husi Aldeia Bosilai sente kontente ho atribuisaun refere, tanba ho konsidera fiziku defisiensia laiha forsa atu harii hela fatin dignu ba oan sira hodi hamahan, maibe Governu liu husi PNDS bele konstrui ona uma dignu.
Benefisiariu nee mos agradese ba Governu neebe implementa programa refere, tanba bele benefisia direita ba povu kbiit laek iha baze no promete sei kuidadu uma refere hodi utiliza ba tinan naruk.
Entretantu UNP 10 refere implementa iha Aldeia Bosilai uma 6 no Defadae uma 4, neebe atribui ba benefisiariu kbiit laek neebe uma hela fatin antes kondisaun aat.
(EST 2)
