AMBENO, STLTIMORLESTE.com – Governu Autoridade Rejiaun Administrativa Espesial Oekusi-Ambeno (RAEOA) ohin simu vizita Prezidente Republika (PR), Jose Ramos Horta, iha fronteira Sakato, Suku Nipane, Postu Administrativu Pante Macassar Oekusi.
Iha vizita nee, PR Horta bainhira hakat liu Fronteira Sakato, kondus rasik nia kareta Jep too fronteira Sakato iha oras 11:17, simu direitamente husi Sekretaria Rejional ba Edukasaun no Asuntu Sosial (SREAS), Inacia Tamele, reprezenta Autoridade RAEOA hodi tara tais ba Prezidente Republika.
Hafoin simu PR Horta iha fronteira Sakato, Estrutura Autoridade RAEOA kompostu husi Sekretaria Rejional ba Edukasaun no Asuntu Sosial, Sekretaria Rejional Agrikultura, Sekretaria Rejional Administrasaun, Sekretaria Rejional Terras no Propriedade, Sekretaria Rejional Saude no Koordenador Ezekutivu Zona Ekonamika Espesial ba Dezenvolvimentu Oekusi-Ambeno (ZEEDOA) João Mendes Goncalves, hamutuk ho funsionariu sira hotu, akompanha husi Komandante Polisia Nasional Timor Leste (PNTL) RAEOA, Superintendente Polisia Nicolau Francelino da Costa halao konvoi husi Fronteira akompanha PR ba almosu iha Hotel Gratidao, Oebau kapital Oekusi.
Tuir ajenda neebe STL asesu, PR Horta sei kontinua halao asaun solidariedade ba ema vulneravel no defisiensia sira iha loraik tuku 3:30, iha Salaun Dominicana Santa Rosa.
Tuir observasaun STL iha Kapital Oekusi, PR Horta mak kondus rasik ninia kareta privadu Jeep, tula KE-ZEEDOA, João Mendes Goncalves ho oin midar PR hasee povu Oekusi neebe hamriik iha estrada ninin sidade Oekusi.
(jos)
