BAUCAU, STLTIMORLESTE.com – Veteranu tinan 24, Fernando “Beredu’u” Gusmão apoia esforsu Governu atu empresta osan tokon US$ 30 husi Banku Mundial hodi responde ba problema bee moos iha kapital Munisípiu Baucau.
Tuir Fernando “Beredu’u” Gusmão emprestimu ne’e bele sai parte husi esforsu Governu atu responde ba preokupasaun komunidade, liuliu kona-ba asesu ba bee moos.
“Deve ne’e, maun boot na’in rua nia esforsu empresta tokon US$ 30 mai iha Munisípiu Baucau atu dada bee moos. Ami veteranu sira nia hanoin, ne’e bele tanba atu responde ba komunidade nia preokupasaun,” hatete Beredu’u ba STL iha Vila Nova Baucau, Kuarta (02/09/2026)
Maski apoia planu refere, maibé nia husu atu Governu mos kontinua halo emprestimu ba munisípiu sira seluk, ne’ebé sei infrenta problema ba infraestrutura bazika.
Nia mos hatete katak emprestimu husi Banku Mundial sei iha impaktu ba nasaun, tanba osan ne’ebé empresta tenke selu fila fali. Tanba ne’e, nia husu atu iha planu klaru kona-ba mekanizmu pagamentu iha futuru.
“Empresta iha Banku Mundial ne’e iha impaktu, maibé ita empresta ne’e sei selu. Ne’ebé ita empresta ne’e oinsá, karik Prezidente Repúblika ho Primeiru-Ministru hatene ona. Atu selu oinsá, karik sira na’in rua mak hatene,” hatete Fernando.
Fernando konsidera planu atu uza emprestimu ba dezenvolvimentu infraestrutura bee moos hanesan planu di’ak, tanba bele ajuda responde ba problema bee moos ne’ebé komunidade enfrenta.
“Planu ida ne’e di’ak tanba atu responde ba ita nia problema bee moos, maibé ba munisípiu hotu-hotu labele ba de’it iha munisípiu ida. Ne’e mak hau husu ba Governu,” nia afirma.
(tom)
