DILI, STLTIMORLESTE.com – Bidau Tokobaru Boxing Club (BTBC) kontinua treinu boxista hodi hasa’e kualidade ba kompetisaun.
Bidau Tokobaru Boxing Club lokalizadu iha Suku Santa-Ana, Postu Administrativu Cristo Rei, Munisípiu Dili, kontinua fó treinamentu regular ba boxista sira.
Treinador Belarmino Belo Ximenex hateten, klubu agora iha boxista liu 40 ne’ebé regularmente partisipa iha treinamentu.
“Ami nafatin fó treinu hodi hasa’e kualidade boxista sira. Treinu lao Segunda too Sábadu, tuku 6 loraik too 8 kalan.”
Nia hateten, bainhira iha kompetisaun, klubu sei halo selesaun ba boxista sira ne’ebé iha kualidade atu reprezenta klubu.
“Wainhira iha eventu, ami sei hili boxista ne’ebé iha kualidade diak atu ba kompete, no aumenta treinamentu iha tempu dader,” dehan nia.
Treinador ne’e mos hateten katak, maioria boxista sira komesa treinamentu husi idade 12 to’o 30.
“Ami fó treinu ba labarik no foinsa’e husi idade 12 to’o 30. Liutan, ami konsidera kapasidade buka iis bainhira kompete.”
Konaba ekipamentu, klubu aranja rasik nesesidade treinamentu no antes hatama proposta ba Ministériu Juventude, Desportu, Arte no Kultura.
Maibé, Belarmino hateten MJDAC orienta klubu atu liu husi Federasaun Boxing Timor-Leste bainhira buka apoiu ekipamentu.
Iha sorin seluk, maluk Timor-oan balun iha rai liur mos ajuda klubu ho ekipamentu boxing ba atividade treinamentu.
Desde 2022, boxista BTBC regularmente partisipa iha kompetisaun sira ne’ebé Federasaun Boxing Timor-Leste organiza.
Iha Agostu liubá, atleta BTBC ida iha klase 72 kilogram hetan pozisaun segundu iha kompetisaun ne’ebé partisipa.
(leo)
