DÍLI, STLTIMORLESTE.com — Bee Timor-Leste, Empreza Públika (BTL-EP), promete kontinua garante distribuisaun bee ba konsumidór sira durante El Niño, ho ajustamentu ba oráriu abastesimentu se bee menus.
Prezidente Komisaun Ezekutiva BTL-EP, Gustavo da Cruz, hato’o deklarasaun ne’e ba jornalista sira iha Palásiu Prezidensiál Nicolau Lobato, Bairo Pité, Segunda-feira (26/10/2026).
Nia hatete katak, BTL sei esforsu atu garante distribuisaun bee ba konsumidór sira, liuliu iha kapitál munisípiu no kapitál postu administrativu ne’ebé tama iha área servisu empreza nian.
“Ami esforsu tomak atu bee bele to’o ba konsumidór sira ne’ebé sai kliente BTL ka área ne’ebé BTL iha responsabilidade ba,” deklara Gustavo da Cruz.
Nia informa katak, bazeia ba monitorizasaun BTL nian, kondisaun bee iha rai-okos kontinua normal. Maski nune’e, empreza prepara estratéjia atu responde ba posibilidade bailoron naruk.
Prezidente BTL husu komunidade atu rai bee iha uma bainhira distribuisaun lao normal, nune’e bele uza durante períodu ne’ebé abastecimentu bee bele menus.
Nia mós aviza konsumidór sira atu informa BTL bainhira haree kanu estragadu ka bee suli lakontroladu, hodi evita desperdísiu no proteje sistema distribuisaun.
Gustavo da Cruz afirma katak, BTL sei kolabora ho autoridade seguransa atu foti asaun kontra ema ne’ebé estraga infraestrutura bee.
“Governu labele kontinua halo investimentu se komunidade la kontribui atu proteje sistema ne’e,” nia deklara.
Nia hatutan katak, ema ne’ebé estraga sistema bee bele hetan multa administrativu entre US$ 50 no US$ 500, no kazu balu bele prosesa tuir lei, depende ba infrasaun ne’ebé akontese.
BTL mós prepara mudansa ba oráriu distribuisaun bainhira bee menus. Gustavo fó ezemplu katak, se agora distribuisaun dura oras 12, empreza bele hamenus ba oras 8 atu konserva bee iha rezervatóriu.
Depois ne’e, bee ne’ebé rai hela iha rezervatóriu sei distribui fali tuir oráriu ne’ebé BTL determina, atu responde ba nesesidade konsumidór sira.
Prezidente BTL hatete katak, El Niño bele akontese entre Novembru no Dezembru, no kontinua to’o Abril. Maibé, nia subliña katak situasaun sei depende ba mudansa kondisaun klimátika no udan.
“Se to’o finál Novembru ka inísiu Dezembru udan seidauk monu, foin ita bele konfirma katak El Niño hahú,” nia hatete.
Iha parte seluk, fundadór Permatil, Ego Lemos, husu komunidade atu kontinua konserva bee no prepara an hodi responde ba mudansa klimátika ne’ebé bele afeta Timor-Leste.
Ego Lemos, ne’ebé mós hala’o knaar hanesan Enviadu Espesiál ba Kultura, Ambiente no Rekursu Bee, hatete katak nia ekipa sei kontinua servisu hamutuk ho joven sira.
Permatil organiza akampamentu no formasaun téknika ba joven sira kada tinan, atu hametin koñesimentu no prátika kona-ba konservasaun bee no ambiente.
“Ita hotu tenke halo asaun iha ita-idak nia fatin,” deklara Ego Lemos.
Prezidente Repúblika, José Ramos-Horta mós husu komunidade atu uza bee ho kuidadu no evita husik bee suli lakontroladu, tanba bee importante tebes ba moris umanu.
(eme)
