DILI, STLTIMORLESTE.com – Ministeriu Publiku (MP) iha alegasaun ba krimi Violensia Domestika ho forma ofensa Integridade Fizika Simples, solisita ba iha Tribunal Singular atu kondena arguidu ho inisial PC, tanba komete krimi hasoru lezada ho inisial LL.
Iha alegasaun loron Sesta (07/02/2025) Prokuradora Ivonia Guterres deklara katak, arguidu konfesa ba faktus sem rezerva, arguidu rekonhese halo duni agresaun hasoru lezada tanba nervozu.
Prokuradora deklara, arguidu konfesa halo agresaun hasoru lezada, motivu tanba lezada koalia fali arguidu nia alin feto neebe hela hamutuk ho sira. Tanba nee MP mantein ho akuzasaun neebe iha, konsidera iha duni agresaun hasoru lezada, no husu ba iha Tribunal atu kondena arguidu pena prizaun fulan 6, suspende ba tinan 2.
Enkuantu husi parte defeza Henrique Mariz husu ba Tribunal atu tetu sirkunstansia hotu, hodi aplika pena multa ba iha arguidu, tanba arguidu foin primera vez mai iha Tribunal no konfesa ba faktus.
Rona tiha arguidu, Tribunal adia ba loron seluk hodi rona desizaun.
Tuir akuzasaun neebe iha katak, iha loron fulan la apuradu, maibe iha tinan 2023, iha Tibar, momentu neeba lezada koalia ba arguidu kona-ba arguidu nia alin feto neebe hela hamutuk ho sira, la kaer servisu hili ai no tein.
Rona ida nee, arguidu nia alin feto sai tiha husi sira nia uma hodi ba hela tiha iha arguidu nia maun sira nia uma. Ho ida nee mak halo arguidu nervozu, halo agresaun ba lezada hanesan tebe no buti lezada nia kakorok hodi latan tiha ba rai.
Konsekuensia husi arguidu nia hahalok nee halo lezada sente moras hodi ba hatoo keixa.
Tanba nee, Ministeriu Publiku akuza arguidu komete krimi Violensia Domestika ho Forma Ofensa Integridade Fizika Simples neebe previstu iha artigu 145 husi Kodigu Penal.
Hatan ba akuzasaun neebe iha, arguidu konfesa imparsial ba faktus katak, arguidu halo duni agresaun hasoru lezada, maibe agora sira diak malu ona, hahu husi akontese problema nee mai too agora la iha tan problema ona.
Lezada mos haforsa tan akuzasaun neebe iha katak, arguidu halo duni agresaun hasoru lezada, maibe komesa husi akontese problema too mai agora la iha tan problema ona.
Audensia julgamentu nee prezide husi Juiz Singular Jose Quintao, Ministeriu Publiku reprezenta husi Prokuradora Ivonia Guterres, arguidu hetan asistensia legal husi Defensor Publiku Henrique Mariz.
(ter)
