DILI, STLTIMORLESTE.com – Kompanhia Cambridge Gulf Limited husi Australia hakarak lori Timoroan ba servisu iha Austrália, no sira iha planu hakarak loke fabrika kabas iha Timor Leste.
Lia hirak nee hatoo husi Diretor Kompanhia Cambridge Gulf Limited, Robert Noshammer ba jornalista sira, bainhira remata halo enkontru ho Prezidente Republika, Jose Ramos Horta iha Palasiu Prezidensial, Bairo Pite, Kuarta (11/12/2024).
Diretor Kompanhia Cambridge Gulf Limited dehan, sira husi emprezariu Australia mai iha TL, nee intensaun hakarak hasoru Prezidente Republika koalia kona-ba explora oportunidade atu nasaun rua nee bele servisu hamutuk, espesialmente negosiante sira husi Australia.
“Ami lokasi geografikamente besik Darwin nomos Timor, entaun ami hakarak estabelese relasaun negosiu potensial iha TL nomos Australia. Agora daudaun barak mak fo tiha ona servisu ba trabalhador Timoroan sira neebe servisu iha ami nia fatin, balun iha area Turizmu nian hanesan hotel, agrikultura. Ami hakarak buka oportunidade oinsa bele fo oportunidade servisu negosiu atu lori Timoroan sira ba servisu iha ami nia fatin, ami mos hanoin oinsa bele ajuda Timoroan sira bele fila fali mai iha Timor halo sira nia negosiu rasik,” katak nia.
Nia hatete, sira mos hakarak estabelese negosiu ida iha Timor Leste, foka ba fabrika kabas oinsa mak halo ba roupa.
“Karik atu estabelese negosiu nee ida mak fokus ba kabas atu halo roupa, hanesan iha Australia fabrika kabas boot iha neeba, maibe tanba demanda neebe makaas husi Australia no mos iha nasaun sira seluk mos ita hatene dala barak kabas nee sira produs iha Xina, Balandes, India sira nee. Entaun ami haree iha Timor potensia atu halo ida nee, karik bele loke fabrika kabas nee parte rua nee servisu oinsa kabas nee bele halo oinsa prontu atu bele lori ba fabrika sira neebe halo fali roupa,” katak nia.
Nia hatutan, agora daudaun hasoru malu ho Prezidente Republika nee faze diskusaun neebe bele kria fabrika nee, karik atu realiza hili lokasi iha Dili tanba jeografia besik loos Australia no mos Portu bele utiliza didiak hetan rezultadu neebe masimu.
Iha biban nee, Prezidente Republika, Jose Ramos Horta hatete, relasaun entre nasaun Australia nomos TL nee besik tebes, liu-liu ba area neebe sira mai, tanba sira nia jeografiakamente besik Timor, entaun relasaun iha parte neeba besik liu.
Xefe Estadu hakarak kontinua hasae kolaborasaun kooperasaun ho parte negosiante, setor privadu sira nee nomos trabalhador sira nia fatin hakarak haforte liu tan relasaun servisu diak liu tan no buka explora liu tan area neebe sira bele ajuda apoiu trabalhador Timoroan.
(eme)
