DILI, STLTIMORLESTE.com — Eis Deputadu Bankada CNRT atual Prezidente Movimentu Reafirmasaun Reformasaun Nasionál (MORRENA), César Valente krítika kualidade no efektividade husi polítika Governu nian neebe aloka subsidiu too US$ 168 milhaun ba kompanhia privadu sira, tanba la hatudu impaktu real no la lori mudansa signifikativu ba moris komunidade nian.
Líder MORRENA nee kestiona alokasaun fundu publiku ho montante boot nee, neebe tuir nia observasaun la fo rezultadu klean iha baze no la solusiona problema sosioekonomiku neebe povu enfrenta loron-loron.
Kestiona Efektividade Subsidia ba Setor Privadu
Tuir César Valente, atribuisaun finansial nee hanesan deit kooperasaun iha liafuan maibe la fo biban ba mudansa estrutural neebe komunidade sira presiza.
“Alokasaun subsidia milhaun ba milhaun ba setor privadu ho montante US$168 milhaun nee la hatudu rezultadu neebe klaru. Estadu presiza haree fali mekanizmu sira nee hodi garante katak osan povu nian la gasta saugati deit,” dehan César Valente ba STL, iha Dili, Sesta nee (14/08/2026).
Nia sublina katak, maske Governu foti desizaun finansial boot, kualidade servisu no benefísiu neebe too ba povu kbiit-laek sira sei dook husi espetativa.
Eis parlamentar nee husu ba ezekutivu atu haree fali ho rigor mekanizmu monitorizasaun no distribuisaun subsidia ba setor privadu sira, hodi foka liu ba programa sira neebe fo benefísiu direta ba sosiedade.
MORRENA fo sai katak gasta orsamentu publiku tenke foka liu ba dezenvolvimentu infrastrutura bazika, fasilidade saude, edukasaun, no hametin setor produtivu iha rai laran, duke fo apoiu finansial neebe la ho mekanizmu kontrolu no akontabilidade neebe metin.
Iha fatin seluk, observador ekonomia, Silveiro Soares, apoia krítika nee no subliña katak Governu tenke halo avaliasaun klean ba efesiensia gasta orsamentu publiku nian.
“Ita presiza duni meiu monitorizasaun neebe rigorozu ba investimentu kapital ho montante boot ba setor privadu ho forma subsidia nee, hodi evita gasta arbiru no fo duni kbiit ba ekonomia real rai laran, duke kria fali dependensia neebe la lori benefísiu ba tempu naruk,” dehan Silveiro Soares.
Silveiro hatutan katak ita tenke foka liu ba diversifikasaun ekonomia no hametin kbiit empreza lokal sira nian ho matadalan neebe moos no transparente, hodi kria kampu de trabalhu neebe sustentavel ba no jerasaun oin mai.
Entretantu, Akademista husi Universidade Paz (UNPAZ), Alarico de Oliveira, konsidera katak Governu presiza halo reforma ba polítika distribuisaun fundu ba setor privadu hodi hasees an husi risku gasta saugati osan estadu nian. Nia salienta katak foti desizaun ho gasta osan boot dook husi matadalan akontabilidade nian sei fo todan ba sustentabilidade fiskal nasaun nian, tan nee presiza duni auditoria no fiskalizasaun neebe independen husi orgaun kompetente sira.
(car)
