DILI, STLTIMORLESTE.com – Relasiona ho vizita Sua Santidade Papa Francisco iha Timor Leste, hahu husi loron 9-11 Setembru 2024, atu liafuan murak labele lakon leet deit, Konferensia Episkopal Timorense (CET) multiplika livru atu fahe ba Dioseze tolu, Baukau, Maliana no Dili, atu nunee sarani lee hamoris nafatin mensajen Sua Santidade Papa Francisco nian iha sosiedade.
Dom Virgilio hatete, diskursu no mensajen sira neebe hatoo husi Sua Santidade Papa Francisco iha Palasiu Prezendesial, ALMA, iha CCD, katedral no Tasi Tolu atu labele lakon deit, iha dalan oin-oin liu husi padre no madre sira kontinua koalia nafatin, atu nunee hamoris nafatin liafuan mensajen Amu Papa Francisco nian iha sosiedade.
“Agora daudaun ita prepara multiplika kria hanensan livru, nunee hatama Amu Papa nia diskursu no mensajen husi kedas Palasiu Prezidente, ALMA, Katedral ba too iha CCD enkontru ho joven sira nomos misa iha Tasi Tolu, iha livru ho lian português no engles no formatu ida tetun no português ida nee mak sei komesa fahe daudaun ona atu lee no reflete hamoris nafatin mensajen Sua Santidade” hatete Arsebispu Arkedioseze Metropolitana Dili, Dom Virgilio Kardeal do Carmo da Silva, SDB ba STL iha Kamara Episkopal Timoremse (CET), Bidau, Dili, Tersa (25/02/2025).
Bibi atan uma kreda nee haktuir, foin daudaun mos fo hatene ona ba Ministeriu Edukasaun entrega ninia formatu ba sira, nunee liu ME mos multiplika livru haruka ba eskola sira.
“CET mos deside ona atu aumenta tan multiplika kopias atu haruka ba dioseze hotu atu fahe hatutan ba parokia sira, nee dalan ida atu mantein nafatin liafuan Sua Santidade Papa Francisco neebe ema hotu rona, maibe emprime mos iha livru kiik oan atu ema tau iha bolsu lori, atu nunee bele lee, nee mak CET esforsu hela,” hatete Dom Virgilio.
Tanba nee, CET mos enkoraja atu kontinua halao publikasaun ba ema hotu, tanba iha ona formatu, hein deit atu multiplika livru mensajen Sua Santidade Papa Francisco.
Dom Virgilio husu ba joven no sarani hotu, kuandu livru too liman laos rai deit, maibe lee reflete bele kalan lee iha familia kuandu reza tersu lee iha familia, nunee mos parokia sira uza hodi fo informasaun ba ema oin-oin, ida nee mak dalan oin atu ita kontinua hamoris nafatin Amu Papa Franscisco nia mensajen atu la hela deit ita ulun, maibe oinsa lee no rona beibeik provoka ita atu pratika iha moris loron-loron.
Entretantu Reprezentante Santa Se iha Timor Leste, Monsenor Marco Sprizzi hatutan, mensajen Amu Papa Francisco nian tau hamutuk tiha ona livru ida neebe halo husi Arkedioseze Dili hodi akumula ka halibur hotu Amu Papa Francisco koalia iha diskursu sira hotu, maibe rekusru minimu nunee nia publika oituan husi livru ida nee.
Amu Papa sai husi Timor, Igreja ho Reprezentante Santa Se iha Timor Leste, Monsenor Marco Sprizzi ba hasoru Primeiru Ministru Kaya Rala Xanana Gusmão promote katak sei publika livru sira nee ho total un milhaun kopias, atu nunee ema hotu bele hetan kopia iha parokia sira.
“Hau enkontru ho PM iha semana kotuk hau fo hanoin fali ba nia kona-ba nia kompromisu ida nee, nia dehan katak nia hatene buat saida mak dehan ho apoiu Prezidensia Republika nian atu tulun hodi publika no disponibiliza tradusaun mensajen no diskursu sira ba povu Timorense,” hatete Monsenor Marco.
Vizita Pastoral durante Sua Santidade Papa Francisco iha Timor- Leste, durante loron 3 hahu husi loron 9-11 Setembru 2024, iha loron 9 Setembru 2024 vizita primeiru Palasiu Prezidente, iha oron 10 Setembru 2024 Sua Santidade vizita Irma ALMA Pantai Kelapa depois de vizita kontinua ba Igreja Katedral enkontru Bispu Madre Relijiozu relizioza, seminarista, Diakonu no Katekista sira remata enkontru Amu Papa Francisco kontinua soru ho Padre Kongresaun Sejuita iha parte lokraik Sua Santidade Papa Francisco prezide misa iha Tasi Tolu.
Iha loron 11 Setembru 2024 Sua Santidade Papa Francisco enkontru ho juventude sira iha CCD Merkadu Lama hafoin soru mutu Sua Santidade Papa Francisco halao serimonia despedida iha Aeroportu Internasional Nicolau Lobato Komoro, Dili, kontinua vizita Pastoral ba iha Singapura.
(joa)
