LIUZHOU, STLTIMORLESTE.com – Ekipa China International Communications Group (CICG) lori delegasaun jornalista Timor oan nain 24 vizita fabrika Jimu Robotics Co. Ltd no SAIC-GM-Wuling Intelligent Island Manufacturing Factory iha Liuzhou, provinsia Guangxi, Republika Xina.
Fabrika Jimu Robotics Co. Ltd, mak kompanhia neebe iha Liuzhou halao produsaun drone responde ba servisu agrikultura no kombate indensiu, neebe hahu rejistu ba produsaun drone iha tinan 2016 no halo nia produsaun dahuluk tuir time line, husi 2019 too 2026, Jimu Robotics produz ona drone tipu diferente hamutuk 11 husi EA-2019 too EAJ160-2026.
Husi tipu drone 11 kompleta ho nia tanki neebe bele ense bee husi litru 18 too 75 tuir kapasidade. Drone hirak nee kompleta sesor kontrola husi oin, kotuk no sorin sorin ho eskalaun 180⁰ too 360⁰ responde ba radar kontrola distansia metru 180 ho luan 40.000 neebe funsiona durante movel tuir batre 20.000 mAh husi sistema nebulizasaun intelejente versaun 5.0.
Durante tinan neen drone refere, sai baze ba setor agrikultura iha Liuzhou reduz kustu ba servisu produsaun agrikola nian, aumenta produsaun ho kuatidade aas. Tanba drone nee bele apoiu bee ba fatin kultiva sira bainhiria la asesu bee no bele apoiu toos nain no natar nain sira nia servisu dezinfekta aimoruk ba aihoris sira hadook aan husi pestisida. Nunee fabrika nee sei kontinua investe atu setor produsaun agrikola sai efisiente liu tan iha Xina.
No seluk mak ekipa halo vizita mos iha fabrika SAIC-GM-Wuling Intelligent Island Manufacturing Factory. Kompanhia nee rasik harii iha tinan 1958 ho naran lokal Wuling, dahuluk sira investe iha produsaun traktor nian, neebe objetivu atu apoiu servisu produtividade nian liu liu iha setor agrikultura, maibe haree ba dezenvolvimentu iha rai laran, kompanhia refere muda nia estratejia investe fali ba fabrika kareta neebe sira inisia dahuluk mak kareta marka L110.
Iha tinan 2002 parte kompanhia asina akordu tama ba faze dezenvolvimentu foun no estabelese ofisial hanesan empreza lokal ba empreza modernu ba fabrika kareta nian iha Liuzhou Republika Xina. No iha tinan 2018 empreza nee rasik propoint estratejia tolu, kompostu halo produsaun ba kareta pasajeiru, halo produsaun transporte eletroniku no intelejente inklui halo internasionalizasaun ba mundu atual kontinua halo produsaun ba kareta sira ho versaun foun utiliza Artifisial Intelijensia (AI).
Sorin seluk, delegasaun jornalista Timor Oan neebe akompanha husi CICG halao vizita mos ba empreza predusaun “mei” Guangxi Loubawang Food Technology Co.,Ltd iha Liuzhou no hatene nia istoria.
Guangxi Loubawang Food Technology Co.,Ltd nia istoria triste no susesu haktuir husi ekran estabelese iha fabrika nee relata, iha tinan 1996 halo produsaun dahuluk ba produtu espagueta husi karakol kiik ho ho naran lokal Lousifen, maibe husi produsaun dahuluk nee falha, tanba sabor husi produtu nee produs azedu la puru, mie la moruk, ingrediente menus, no lakon seiru karakul.
Husi falha nee marka konkurensia boot husi liur hanesan, Master Kang no BaiXiang okupa 90% merkadu. Maibe iha 2014 Guangxi Loubawang Food Technology Co.,Ltd investe makaas iha nia fatin produsaun ho teknolojia modernu apoiu servisu no garante produtu nia sabor atual sai susesu ho 5 millaun vendas too mundu husi dadus produsaun kada loron ida sira produs kuaze 1.4 millaun pakote edisaun ho trabalhador apoiu servisu besik 500.
Produsaun seluk mak, fabrika nee mos halo produsaun ba supremi ho teknolojia fornesimentu otomatiku no dezenvolve konektividade kada loron produs pakote 1.5 millaun, neebe hetan apoiu servisu husi trabalhador lokal 1000.
“Husi mie kiik ida deit bele halo industri boot hanesan nee, la fasil. Presiza estuda no halo sumariu ho diak. Atu dezenvolve industria tenke iha karakteristika rasik. Luosifen mak karakteristika. Transforma ba industria iha lian laran tenke kontinua brand, foku ba kualidade aas no padraun aas. Hau fiar katak iha futuru industria Luosifen sei iha dezenvolvimentu no perspetiva neebe boot liu tan,” nee Prezidente Republika Xina, Xi Jinping nia mensajen neebe STL sita husi ektran iha fatin produsaun Guangxi Loubawang Food Technology Co.,Ltd
Nia sublina katak, presiza promove padronizasaun no brand ba industria, tulun industria lokal neebe iha karakteristika atu dezenvolve ho kualidade aas. Governu Sentral enkora makaas ba ninia empreza privadu sira atu dezenvolve fatin no bainhira hasoru susar, Partidu no Estadu prontu fo apoiu. Bainhira sira hasoru difikuldade, ami fo orientasaun. Objetivu mak atu empreza privadu sira bele dezenvolve hodi exporta hahan lokal sira ba ASEAN.
Enkuantu fabrika tolu neebe ekipa CICG akampanha delegasaun jornalista Timor oan 24 halao vizita nee nota, segredu ba produsaun mak laos teknolojia, maibe pasiensia.
(tom)






