BAUCAU, STLTIMORLESTE.com – Konselhu Munisipal Kombatentes Libertasaun Nasional (CMCLN – sigla português) husu veteranus sira iha Munisipiu Baucau, partisipa iha loron aniversariu FALINTIL ba dala 51 neebe realiza iha foho Matebian, Postu Administrativu Matebian, Munisipiu Baucau.
Sekretariu CMCLN Baucau Roberto Carlos da Costa ‘Laran Taridu’, aprezenta, seremonia aniversariu FALINTIL ba dala 51 neebe sei selebra iha foho Matebian, nuudar seremonia anivel Nasional, iha neebe orientasaun husi Nasional ba kada Konselhu Munisipal iha territoriu nasional, delega deit veteranus dezmobilizadu nain lima (5) hodi reprezenta maluk veteranus no kombatentes hotu iha selebrasaun refere.
“Ida nee laos taka dalan ba veterarus sira, nee hanesan komvidadu espesial husi Munisipiu ida ema nain lima, maibe iha possibilidade veteranus no kombatentes neebe besik bele partisipa,” hateten Laran Taridu ba STL iha nia knaar fatin CMCLN Vila Antiga Baucau, Kuarta (19/08/2026).
Nia rekoinhese, selebrasaun loron FALINTIL ba dala 51 nuudar momentu importante ba veterarus no kombatentes sira atu partisipa, maibe Governu labele mobiliza ema hotu hotu atu partisipa iha selebrasaun refere, tanba kestaun distansia no fatin.
Maske nunee, CMCLN Baucau husu ba veterarus no kombatentes sira husi Postu Administrativu Baguia, Quelicai, Matebian, Laga no Quelicai Antigu atu partisipa iha selebrasaun refere.
“Hau hanoin ida nee mak momentu importante sira neebe besik bele partisipa hodi fo sira nia observasaun no istoria atu konkista fila fali memoria haree ba tinan 50 oin mai nee saida mak tenke halo,” katak Laran Taridu.
Entretantu, veteranus dezmobilizadu neebe husi Konselhu Munisipal Baucau atu partisipa iha selebrasaun refere mak hanesan, Cornelio Gama “L7”, Fernando “Beredu’u” Gusmão, “Lotu”, “Uatu-Ono”, no komadante “Kokoroi”.
(tom)
