DILI, STLTIMORLESTE.com – Tuir Estatutu Defensor Publiku mensiona katak, knaar Defensor Publiku mak fo asistensia ba iha ema neebe vulneravel ka la iha finanseiru atu selu Advogadu Privadu sira.
“Prodente signifika katak, asumi responsabilidade asiste prosesu nee too rohan, la hanoin hakarak buat onorariu, tanba prinsipiu Defensor servisu ba ema vulneravel sira no sira neebe la iha osan,” dehan Defensor Publiku Jeral, Cansio Xavier ba jornalista sira iha Kaikoli, Tersa (18/08/2026).
Nia hatutan, kuandu iha ona ordem Advogadu Privadu nian, ema sira neebe iha osan Defensor Publiku sei la fo asistensia ba, maibe sei haruka ba iha Advogadu Privadu sira mak fo asistensia ba.
Esplika, oras nee daudaun numeru ba iha Defensor Publiku hamutuk nain 38, inklui Ministru Justisa no mos Defensor Publiku Jeral.
Konaba kandidatu ofisial Justisa sira neebe tuir hela formasaun nia dehan, agora tama hela faze teoria, depois ida nee sira integra ba faze pratika no estajiu wainhira sira aptu, sira sei asumi responsabilidade nudar ofisial justisa, wainhira sira la aptu signifika katak, sira sei sai husi ofisial justisa tantu sira neebe uluk temporariu no sira agora nee, iha karakter eleminatoriu.
Iha sorin seluk, Vise Ministru Justisa, Paulo Remedios dehan, Defensor nia knar atu atende ema neebe kiit laek.
“Hau fo rekomendasaun iha hau nia palavra, Defensor Publiku tenke responsabilidade tenke hare didiak estatutu Defensoria Publika sira nia knar atu fo apoiu juridiku ba populasaun vulneravel signifika, populasaun la iha rekursu ekonomiku,” dehan nia.
Hatutan, Defensor Publiku nia knaar laos apoiu ba emprezariu no kompania sira, maibe ba ema neebe kbiit laek, tamba iha DP balu Ministeriu Publiku ho apoiu Defensor Publiku Jeral fo tiha ona prosesu disiplinar ba sira, tamba viola regra neebe iha.
Profunda, Defensor nia papel atu ajuda ema neebe kiak la iha finanseru, laos reprezenta ema riku ema kompania nee lei bandu.
(ter)
