DILI, STLTIMORLESTE.com – Kazu dengue zero iha hospital Tasi-Tolu, ekipa integradu husi Hospital Nasional Guido Valadares (HNGV) no Ministeriu Saude (MS), Servisu Saude Munisipiu Dili no ekipa tekniku sira hotu foti desizaun hamutuk hodi desativa funsionamentu iha hospital refere.
Informasaun nee hatoo husi Diretor Servisu Apoiu Diagnostiku no Terapeutiku HNGV, Vidal de Jesus Lopes iha Hospital Tasi-Tolu, Sesta (10/04/2026).
Nia hatete, wainhira fatin nee la utiliza ona, ekipa integradu nee mos se retira fali pesoal saude no ekipamentus hodi entrega ba idak-idak nia servisu fatin anterior.
Nia katak, pesoal saude neebe durante halo servisu iha Hospital Tasi-Tolu 105 kompostu husi mediku, enfermeiro, tekniku aliadus, apoiu lojistiku, servisu limpeza no servisu seguransa neebe ekipa integradu husi HNGV, Servisu Saude Munisipiu Dili, Postu Saude no Hospital Referal.
“Pesoal saude neebe liu vaga ba saude munisipiu no hospital referral tuir lolos destaka ba munisipiu maibe tanba infrenta kazu dengue as iha Dili MS disidi entrega sira ba HNGV hodi jere maibe wainhira kazu moras dengue la iha ona, pesoal saude sira nee se fila fali ba ida-daik nia servisu anterior,” dehan nia liu husi media HNGV neebe STL asesu Sesta nee.
Nia afirma, durante pasiente dengue neebe halo tratamentu iha Hospital Tasitolu la iha ida mak lakon vida ka mate tanba pasiente barak liu nee mai ho kazu dengue ho kategoria kaman.
Aleinde nee nia haktuir kazu moras dengue neebe rejista iha Hospital Tasi Tolu hahu husi Janeiro too Abril 2026 hamutuk 510 pasiente.
Entertantu atividade nee partisipa husi Diretur Ezekutivu HNGV, Diretora Enfermajem no Parteira HNGV, Diretora Servisu Administrasaun Finansas, Logistika, no Aprosionamento HNGV, Xefe Departamentu, Edukador/a no Ekipa Integradu Profisionais Saude Hospital Tasi-Tolu.
(dom)
