DILI, STLTIMORLESTE.com – Deputada husi Bankada CNRT Preokupa ho protokolu husi Prezidensia Republika neebe atende ema ladun diak, hatan ba preokupasaun nee, Prezidente Republika Jose Ramos Horta hatete, labele kritika deit, se iha konhesimentu bele mai hanorin.
Prezidente Republika Jose Ramos Horta hatoo kestaun nee ba jornalista sira iha Aeroportu Internasional Nicolao Lobato, Kuarta (18/12/2024), hodi responde ba Deputada Cedeliza Farria Dos Santos nia lamentasaun ho aktu husi pesoal protokolu Palasiu Prezidensial neebe litik konvidados sira partisipa iha serimonia forum Nasional tais.
Prezidente Republika dehan, deputada sira iha Parlamentu Nasional labele kritika deit, se iha konhesimentu ruma bele mai hanorin protokolu sira.
“Deputadu sira la bele kritika deit, maibe karik iha konhesimentu ruma kona-ba servisu protokolu bele hanorin sira. Se deputadu sira konhese diak los protokolu, deputadu sira hatene protokolu nivel internasional, kualidade, favor mai hanorin iha Prezidensial, hau prontu atu simu deputadu sira atu mai hanorin hau kona-ba protokolu, nee hau agradese no kontente los,” katak PR Horta.
Deputada Cedeliza Farria Dos Santos lamenta ho aktu husi pesoal protokulu palasiu Prezidensial neebe litik konvidados sira bainhira partisipa iha serimonia Forum Nasional Tais.
“Hau husu atensaun ba visi Ministru atu enkamina Xefe Kaza Sivil tau atensaun ba assuntu ida nee, tanba nee ladun diak, hahalok ida nee ba oin presiza tau atensaun,” katak Deputada.
Deputada dehan, atitude protokolu Prezidensial Republika halo partisipante hotu preokupa makaas liu-liu iha eventu serimonia Forum Nasional Tais neebe mak realiza iha Palasiu Prezidensial.
Nia dehan, aktu nee la diak, tanba nee presiza tau atensaun, tanba konvidadus bainhira tama ba laran litik konvidadus sira tun sae hanesan la konhese partisipante sira, ida nee laos ba deputadu no deputada deit, maibe ba mos povu kbiit laek sira.
(eme)
