DILI, STLTIMORLESTE.com – Tribunal Judisial Primeira Instansia Dili liu husi despaisu ikus deside aplika medida Prizaun Preventiva ba iha arguidu ho inisial AD, tanba konsidera iha indisius forte ba krimi neebe Ministeriu Publiku promove mai iha Tribunal ho krimi omisidiu agravadu.
Prosesu refere Ministeriu Publiku Renato Bere Nahac promove arguidu ho krimi omisidiu agravadu neebe previstu iha artigu 139 husi Kodigu Penal.
Rona tiha arguidu nia deklarasaun iha prosesu primeiru interogatoriu nee, ikus mai Juiz Turnu Jose Escurial deside hodi aplika medida Prizaun Preventiva ba arguidu, tanba iha indisus katak arguidu mak baku mate matebian Isac Soares iha area Beduku Munisipiu Likisa, iha loron Sesta.(28/02/2025).
Hafoin despaisu husi Tribunal, tuir defeza arguidu nian, Advogadu Privadu Fernando da Costa katak, matebian dun arguidu naok ten, hasai lia fuan mal mak ikus mai akontes problema no kauza matebian lakon vida.
“Deklarasaun arguidu nian katak, motivu husi kazu nee katak vitima dun naok ten ba nia depois dehan katak tolok nia ba nia inan no aman, depois hateten ba patraun labele selu ninian osan. Entaun ida nee mak arguidu nervozu hodi foti besi argola nee baku dala rua, dala ida kona nia lima no ida kona ninia ulun nee mak afeta vitima mate liu,” dehan Fernando ba jornalista sira iha TJPID Kaikoli, Segunda nee.
Nia dehan, Tribunal deside aplika media koasaun Prizaun Preventiva ba arguidu, tanba hahalok arguidu nia nee iha indisiu krimi tanba halo mate vitima.
Nia sublina, iha alegasaun defeza husi ba Tribunal atu aplika medida aprezentasaun periodika, maske arguidu iha duni indisiu ba krimi ida nee, atu durante investigasaun husik aplika medida ida nee ba arguidu atu nunee arguidu iha liur hodi submete ba prosesu investigasaun. Maibe Tribunal nia haree katak medida koasaun neebe adekuadu mak prizaun preventiva.
Nia reforsa, sei halo rekursu ba desizaun Tribunal nian nee, maibe sei kordena ho familia arguidu nia molok halo rekursu kontra desizaun Tribunal nian.
Prosesu nee prezide husi Juiz Turnu Jose Escurial, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Advogadu Privadu, Fernando da Costa.
(ter)
