DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ikus, deside aplika medida Aprezentasaun Periodika (AP) ba iha arguidu ho inisial JFdA.
Arguidu submete mai iha Tribunal, no Prokurador Turnu Matias Soares halo promosaun mai iha Tribunal ho krime Falsifikasaun Dokumentus ka Notasaun Teknika Agravada.
Iha Tribunal Juiza turnu Ana Paula Fonseca rona tiha arguidu nia deklarasaun, deside tama ba alegasaun husi parte Ministeriu Publiku no defeza arguidu nian.
Iha alegasaun Prokurador Matias Soares solisita ba iha Tribunal atu aplika medida Prizaun Preventiva ba iha arguidu.
Enkuantu husi parte defeza arguidu nian, Germano Ramos Guterres solisita ba iha Tribunal atu aplika medida aprezentasaun periodika, razaun tanba arguidu nia inan sofre hela moras.
Rona tiha alegasaun, iha despaisu Tribunal nian liu husi Juiza turnu Ana Paula Fonseca deside aplika medida Aprezentasaun Periodika ba arguidu.atu aprezenta aan iha Eskuadra Polisia neebe hela besik ba fulan ida dala ida.
Prosesu primeiru interogatoriu nee prezide husi Juiza Turnu Ana Paula Fonseca, Ministeriu Publiku reprezenta husi Prokurador Matias Soares, arguidu hetan asistensia legal husi Defensor Publiku Germano Ramos Guterres.
Rekorda katak, Servisu Investigasaun Kriminal (DSIK) iha Polísia Nasionál Timor Leste (PNTL) kumpri mandadu detensaun no buska husi Tribunal Judisial Primeira Instánsia Dili, ho Nuc 0014/25.PGGCC, detein arguidu iha loron 8 fulan Agostu iha Aldeia Lebumera, Suku Foho-Ailico, Postu Administrativu Hatu-Udu, Munisípiu Ainaro.
Asaun detensaun no buska nee halao bazeia ba mandadu husi autoridade judisiária, tanba iha indísiu forte kona-ba alegasaun katak, suspeitu JFdA iha envolvimentu iha krime Falsifikasaun Dokumentus ka Notasaun Teknika Agravadu neebe previstu iha artigu 303 no artigu 304, husi alinea 1, Kodigu Penal Timor Leste.
(ter)
