DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ikus ba prosesu Primeiru Interogatoriu, deside aplika medida koasaun Prizaun Preventiva ba arguidu sidadaun Xineza ho inisial CF, neebe deskonfia sosa droga fo ba nia kolega sidadaun Indonezia nain 4 konsumu.
Arguidu CF lori ba iha Tribunal Ministeriu Publiku promove ho kríme Trafiku I ilisita droga iha artigu 7 lei Nu.2 /2017 iha kodigu penal Timor Leste.
Iha Primeiru Interogatoriu nee Juiz prosesu, José Maria Araújo halo tiha identifikasaun no rona tiha deklarasaun arguidu nia, Tribunal deside hodi tama ba alegasaun Ministeriu Publiku no parte Defeza nia.
Nune iha Alegasaun Ministeriu Publiku reprezenta husi Prokurador Matias Soares, husu Tribunal aplika medida koasaun Prizaun Preventiva (PP) ba arguidu CF, tanba deskonfia iha indisus ba krime neebe komete.
No parte Defeza nia husu Tribunal atu aplika medida koasaun Aprezentasaun Periodika (AP), ba arguidu atu nunee fo tempu ba arguidu atu buka faktus sira.
Maibe Juiz turnu afavor ba pedidu Ministriu Publiku nia, hodi aplika medida koasaun Prizaun Preventiva, tanba durante Primeiru Interogatoriu arguidu konfesa faktus, tanba nee Tribunal konsidera katak faktus sira nee provadu, hodi hein prosesu investigasaun.
No kazu droga komete hosi nain-lima (5) kompostu hosi sidadaun Indonezia nain 4 no sidadaun Xineza nain-ida (1), hosi feto nain-rua no mane nain-tolu ho inisial S, IP, YM, AF no CF.
Arguidu no arguida sira deskonfia lori no konsumu droga nee ba sira nia-an ho tipu Meta phetamine ho Stasi, no arguidu sidadaun Xineza CF, nudar faan droga ba nia kolega sira ho Grama 1,040.
Audensia julgamentu dahuluk nee, Prezide hosi Juiz turnu, José Maria Araújo, Ministeriu Publiku reprezenta Prokurador, Matias Soares no arguidu hetan asistensia legal hosi advogadu privadu nain-ida.
(ter)
